(Dawamı. Bası ótken sanda.)

-Yaqshı onda, táwir bolıp ket,-dep Azat ketip baratırǵan waqıtta, Murat onı toqtatıp soradı.

-Ákesi ishiwshilikke beril­gen shańaraqlardı bileseń be?

-Haw, ne edi?-dedi Azat tańlanıp.

-He-esh… Keshe televizor­dan kórip qalıp edim, soǵan sorap atırman,-dedi ol albırap. -SeniÅ„she bul jaǵdaydıń aldın alıw ushın ne islew kerek?

-Himm,-dedi Azat oylanıp. Esitiwimshe, sol shaÅ„araqta bir adam qaytıs bolsa, kóp waqıtqa shekem araq ishilmeydi eken…

Murattıń ákesi aldın qarawıl bolıp isleytuǵın edi. SoÅ„ kimlerdur onı shet elge jumıs­qa shaqırdı. Ol jerde durıslı jumıs taba almay qaytıp keldi. Qurılısta isley basladı. Kóp ótpey, ishiwshilikke berildi. Mine endi hár kúngi awhal…

«Men aldıńǵı, mehriban ǵana, bizler menen hár kúni birge oynaytuǵın ákejanımdı joytıp aldım. Ákejan, qaydasız, sizge ne boldı?

Qáne edi, ákem bul jaman ádetin taslap, jáne aldıńǵıday jumıstan sappa-saw, kúle shıray menen kelip, bizlerdi erkeletip, bawırına bassa… Sonda dún­yada bizlerden baxıtlı shaÅ„araq bolmas edi-aw…», degen sózlerdi jılay-jılay aq qaǵaz betine túsirdi de, onı kórpeshesiniÅ„ astına tıǵıp qoydı.

Murat uyqılap atırǵan anasınıń kózlerinen, mehir tolı júzlerinen súymekshi boldı. Biraq, onı oyatıp alıwdan seskendi. Áste aqırınlıq penen barıp, jańa ǵana uyqılaǵan úkeleriniń betlerin sıypalap, qushaqlaǵan boldı, soń ayaǵınıń ushında júrip úyinen shıǵıp ketti.

Mashinalar zırıldap ótip turǵan dárya ústindegi kópirdiÅ„ shetine barıp, temir tosıqtan atlap ótip, dárya tolqınlarınıń tezligi terbetip turǵan hawaǵa júzin tutıp turar eken: «Mehriban anajanım, perish­tedey siÅ„lim Nursulıw, erke ǵana Erkin úkejanım! Sizler endi ulıwma qıynalmaysız. MeniÅ„ janım sizler ushın pıdá!»,-dep kózlerin tarsa jumdı da, tez pát penen aǵıp turǵan dáryaǵa ózin attı…

*   *   *

Balasınıń jazıp ketken xatın kórgen ata-anasınıń júrek-bawırı órtenip atır edi. Ásirese, ákesi pushaymanlıqtan, qılǵan islerinen ish-etin kemirip atır. Murattıń biydárek ketkeni, ózin dáryaǵa taslap, denesiniń hesh jerden tabılmay atırǵanı pútkil awıldı úlken qáweterge saldı.

*   *   *

Murat boyın taslaǵan dáryanıń bir tárepinde bir topar balalar shomılıp atır eken. Olar kópirden jıǵılıp túsken balanı kóriwden, sol tárepke qaray júze basladı.  Soń birgelikte Murattı qur­ǵaqlıqqa alıp shıqtı. Onıń qıymılsız denesin hám nápes almay atırǵanlıǵın sezgen balalar onnan seskendi de, tım-tıraqay qashıp ketti. Jarat­qannıń hámiri hám óz ben­desine bolǵan miyrimi menen Murattıń janı aman qaldı. Biraz waqıt ótip, Murattı aspan qoynında jarqırap turǵan quyashtıń ıssı nurlarınıń shaǵılısıwı oyattı. Jer bawırlap jatırǵan Murat quyashtıń ótkir nurlarınan kózlerin zorǵa ashıp, jan átirapına jaltaqladı.

Jatırǵan jeri kózine ısıq kórindi. Mektepte baslawısh klasta birge oqıp, 4-klasta qońsı awıldaǵı mektepke kóship ketken jorası Kamaldıń awılı ekenligin tanıdı.

Ornınan turıp, tabanın kúydirip atırǵan ıssı jer betinde jalań ayaq júrip barar eken, aldınları klaslas balaları menen birge kelip, futbol oynap, may topıraqtı shan­ǵıtqan gezleri esine tústi. Jalań ayaq izleri menen bir baǵıtta jol sızıp barar edi.

(Dawamı bar.)

Dinora BEGDULLAEVA

Nokis qalası