Jaqında paytaxtımızdaǵı Respublikalıq málimleme resurs orayı, balalar kitapxanasına barǵanımızda kóplegen kitapqumar balalar menen birgelikte jası úlkenlerdi de ushırattıq. Bul jerde ayırım balalar menen jaqınnan tanısıp, olardı sáwbetke tarttıq.

Eki tuwısqan Miratdin Xapizatdinov hám Aydana Hapizatdinovalar paytax­tımızdaǵı 42-sanlı ulıwma bilim beriw mek­tebiniń úlgili oqıwshıları eken. Mirat­dinnıń ózi 5-klasta, al onıń sińlisi 3-klasta oqıydı eken. -Bizler hár kúni usı kitap­xanaǵa kelemiz. Úyde ata-anamız, mektepte ustaz­larımız kitaptı kóp oqıǵan adam xor bolmaydı dep aytadı. Sonlıqtan úkem ekewimiz jiyi-jiyi usı kitapxanaǵa kelip ádebiy kitaplardı alıp oqıp atırmız.

-Men balalar jazıwshı, shayırlarınıń gúrriń, ertek, poemaların, qosıqların súyip oqıyman. Qolımdaǵı bul oqıp atırǵan kitabım Jumaniyaz Óteniyazovtıń «Araldaǵı akula» kitabı. Júda qızıq eken, -deydi Miratdin.

-Maǵan kóbinese hay­wanatlar dúnyası haqqındaǵı kitaplar júdá unaydı,-deydi Aydana.

Paytax­tı­mız­daǵı 11-sanlı ulıwma bilim beriw mek­tebiniń 2-klass oqıwshısı Baxıt Niyazov hám 3-klass oqıwshıları Dáw­letbay Dáw­letiyarov hám Ázizbek Saparbaevlar da sózge aralastı. -Bizler dem alıstı usı kitap­xanada hár qıylı qızıqlı kitaplar oqıw menen ót­kerip atırmız,-deydi olar.

-Bizler bir kóshede tu­ramız. Úy­lerimiz de kitap­xanaǵa jaqın jerde jaylasqan. Úshewimiz hár kúni azanda birge ke­lemiz,-deydi Dáw­letbay.

Bul kitapxanaǵa,s ásirese mektep, kolledj, licey oqıw­shıları, joqarı oqıw orınlarınıń studentleri, sonday-aq jası úlken nuranıy, aǵa-apalardıń da kelip kitap oqıp atır­ǵanlarınıń gúwası boldıq.

Solardıń ishinde nuranıy kitapqumarlardan Azat Niyetullaev, Jáhángir Murat­baev, Saida Usnatdinova, Gulbáhár Bekmuratova, Áliysher Irmanov, Aysánem Mámbetkárimova hám bel­sendi kitapqumar oqıw­shılardan Azizbek Nájimat­dinov, Daniyar Bekmurzaev, Aygerim Quwanıshbaeva hám Murat Shúkirullaev kibi kitapqumarlardı kórip súy­sindik.

Bul kitapxanada paytax­tımızdaǵı 38-sanlı ulıwma bilim beriw mektebiniń 6-klass oqıwshısı Murat Shú­kirullaev jıl dawamında 50 márte kelip 236 kitap alıp oqıp, jıl dawamında eń kóp kitap oqıǵan kitapqumar bala dep ta­bılǵan. QMU­niń filologiya fakulteti 2-kurs studenti Dilaram Ber­dimuratova kitapxanaǵa jıl dawamında 30 márte kelip 97 kitap oqıǵan.

Úlken jas­taǵı kitap­qumarlardan Azat Niye­tullaev jıl da­wamında 16 márte kelip 66 kitap hám gazeta-jur­nallar alıp oqıǵan. Jıl dawamında bul jerde eń kóp oqılǵan kitap jáhán áde­biyatı dúrda­na­larınan Alek­sandr Dyumanıń «Graf Monte Kristo» kitabı boldı. Bul kitaptı bizler de júdá qızıǵıp oqıǵanbız. Sonday-aq qırgız xalıq jazıwshısı Chińǵız Ayt­matovtıń «Ásirge tatırlıq kún» shıǵarması jas kitap­qumarlar tárepinen eń kóp oqılǵan shıǵarma dep tabıldı.

Jaslar arasında Qara­qalpaqstan Respublikası jazıwshılar awqamı, «Qar­lıǵash» balalar jurnalı menen birgelikte «Ádebiyat shay­daları» dógeregi shól­kem­­lestirilgen. Sonday-aq «Til bilgen-el biledi» dege­nindey bul kitapxanada inglis tili dógeregi «Quwnaq inglis tili» uranı astında oqıw shını­ǵıwların  ótkeredi. Bul dó­gerekte házirgi waqıtta 5 toparda 35 oqıw­shı oqıp, bilim almaqta. Yapon tili dógeregi de shólkem­les­tirilgen. Yapon tili dógeregi «Quwnaq yapon tili» uranı astında oqıw shınıǵıwların alıp baradı. Bul dógerekke jámi 35 oqıwshı aǵza. Qullası Ziya máskanınıń pidayı dosları ózleriniń bos waqtın biykar ótkermesten jetik-tálim hám tárbiya almaqta.

Qundız ZIYRAPOVA

QMUniń jurnalistika tálim baǵdarınıń studenti