-Balalıǵımda ata-anam bazarǵa barsa, bárqulla maǵan, dástan, ertek, ádebiy kitaplar satıp ákelip beretuǵın edi. Olar bazarǵa ketse, asıǵıslıq penen kútip otı­ratuǵın edim. Sebebi, kitaplar meniń eń jaqın sırlasım, dostıma aylanǵan. Sol kitaplar maǵan ómirde qalay. qáytip jasawdı úyretti. Tuwrı jol siltedi,-dep gáp basladı qaharmanımız.

Jazǵı demalısqa shıǵıwdan awıldıń kempir-ǵarrıları úyimizdiń aldındaǵı náhán qarataldıń sayasına jıy­nalısadı. Hámmesi meni júdá jaqsı kóredi. Sebebi, men olarǵa dástanlardı kámine keltirip oqıp beretuǵın edim. («Edige», «Alpamıs», «Qırıq-qız», «Sháryar»», «Más­patsha» hám taǵı basqa da dástanlardı) Olar qattı berilip tıńlap otıradı. Há bárekella, qızım, kem bolma, baxıtlı bol!» dep qayta-qayta pátiya­ların bergen. Bálkim, meniń muǵal­limshilik kásibin tańlap, jetik qá­nige bolıp je­tilisiwimde usı awılımdaǵı aq­saqallı atala­rı­mızdıń, aq­jaw­lıqlı kempir apa­ları­mızdıń aq pátiya­ları shı­ǵar,-deydi ol.

Ol 1961-jılı Tashkent mám­leketlik peda­go­gikalıq univer­sitetin tabıslı ta­mamlap, miynet jolın mu­ǵallimshilik kásibinen basladı.

Qaharmanımız Tájigúl apa Bayjanova Xojeli rayonınıń 29-sanlı ulıwma bilim beriw mektebinde pi­dayı ustaz bolıp 20 jıl islegen bolsa, 30 jıl sol mekteptiń direk­torı bolıp xızmet atqardı. Úzliksiz 50 jıl jas áwladqa tálim-tárbiya berdi. Ká­sip­lesleri hám shá­kirtleri arasında úlken húrmet-izzetke iye boldı.

Ózbekstan hám Qara­qal­paqstan Xalıq bilim­len­diriw aǵlası, Miynet veteranı Tájigúl apa Bay­janovanıń keleshek áwladqa tálim-tárbiya be­riwde, olarda dúnyaǵa jańasha kóz-qarastı qálip­lestiriwde, úlken xızmet etti. Házirgi waqıtta húrmetli dem alısta, aqlıq-shaw­lıq­la­rınıń mehriban kempir apası.

-Men, napaqada bolsam da, shákirtlerim úyime kelip, halımnan xabar alıp turadı. Men bunday itibardan shette qalmaǵanıma quwanaman,-deydi ol.

Onıń úyi rán-báreń gúl­lerge tolı. Átirapqa hosh iyis taratıp, gózzallıqqa  bólep tur. Pidayı ustazdıń gúllerge bolǵan mehiri hám itibarın kórip súysindik.

Biz de óz gezeginde ádiwli ustazǵa bekkem densawlıq, shańaraǵına amanlıq tileymiz.

Gúljayna PAXRATDINOVA

QMUniń jurnalistika tálim baǵdarı studenti