Dáwletbiyke Erejepova Nókis rayonındagı 16-sanlı ulıwma bilim beriw mektebiniń  3-klasın tabıslı tamamladı. Ádebiy kitaplardı, ásirese erteklerdi oqıǵandı júdá unatadı. Sporttıń kórkem gimnastika túri menen shuǵıllanadı.

-Kishkeneligimde te­le­vi­zordan sportshı qız­lardıń háre­ket­lerin kórip, olarǵa háwe­sim kelip, ózimshe qol ayaq­la­rımdı há­reketlendirip shını­ǵıwlardı islep jú­retuǵın edim. Sport túrleriniń ishinde gim­nastika  maǵan júdá-júdá unap qaldı,-deydi qahar­ma­nımız Dáwletbiyke.

-Qızımızdıń ádebiy kitaplar oqıw menen birge sporttıń kór­kem gimnastika túrine qızıǵıwshılıǵı hámme­mizdi quwantıp atır. Turatuǵın jerimiz pay­taxtımızǵa biraz shaqırım qashıqlıqta jaylasqan. Dáw­letbiyke paytaxtımızdaǵı Olimpiya hám milliy sport túrleri boyınsha Nókis joqarı sport sheberligi  mektebiniń  kórkem gimnastika bólimine kelip, ol jerde eki jıldan berli ustazlarınan gim­nastikanıń názik sırların úyrenip atır. Ol jerde oqıwshılarǵa barlıq múm­kinshilikler jaratılǵan. Hátte, úy-ishimiz benen oylasa otırıp, qızımızdıń gim­nastikaǵa qatnawı ushın «Matiz» jeńil mashinasın da aldım,-deydi ákesi Yusipbay Juma­niyazov biz benen sáwbetlesiw waqtında.

Haqıyqatında da jas óspirim Dáwlet­biykeniń kórkem gimnas­tikaǵa degen qızıgıwshılıǵı ózgeshe. Ol jas bolıwına qa­ramastan kórkem gimnastika boyınsha ótip atırǵan qalalıq hám respub­likalıq jarıs hám túrnirlerge qatnasıp aldıńǵı orınlardı iyelewge erisip kiyatır.

-2017-jılı «Nawrız» bay­­ramına baǵıshlanıp ótkerilgen jarısta sıylı 2-orındı, al, sol jılı Tashkent qalasında ótkerilgen jas óspirimler ara­sındaǵı ótkerilgen turnirde 3-orındı alıp ata-anasın, ustazların quwanttı. Onnan úmi­timiz kóp. Keleshekte respub­likamızdıń,qala berse gúllengen Óz­bekstanımızdıń bay­raqların jelbiretip elimizdi pútkil dunyaǵa tanıtadı  dep isenemen deydi,-treneri Albina Nuratdinova.

Házir ol jazǵı dem alısta us­tazınan kórkem gimnastikanıń názik sırların úyrenip aldaǵı jarıslarǵa qızǵın tayarlıq kórip atır. Bizde óz gezeginde gózzallıq shaydası bolǵan Dáwletbiykege óziniń talapshańlıǵı, kórkem gimnastikaǵa bolǵan ıqlasınıń arqasında tabısları mol bolatuǵınlıǵına isenemiz.

Genjebay JÚGINISOV