Biz Taqıyatas rayonındaǵı «Aydın jol» balalar dem alıw orayına jol aldıq. Ele ol jerge jeter-jetpesten burın balalardıń shadlı kúlkisi uzaqtan esitildi. Orayǵa kirgenimizde kók-kómbek terekler, uwıljıp pisken miywe daraqları kózdiń jawın aladı. Úlken basseyin ortasındaǵı shertekte balalar ǵawırlasıp atır. Demalıwshılardıń birazları sayamanlı qoyıw daraqlar astında shaxmat-shashka oynap bellesip atırǵan bolsa, birazları ayaq-oyın dógereginde shuǵıllanbaqta. Kimisi, kóshpeli kitapxanada ádebiy kitaplar oqıp otır.

Biz bul jerde oraydıń bas tárbiyashısı Juldız Qádirber­genovanı ushırattıq.

-Orayımızǵa xosh kelip­sizler! Bıyıl orayımızǵa ulıwma  bes gezekte 625 balanı qabıllaw rejelestirilgen. Birinshi gezekte Qońırat, Taxtakópir, Shımbay, Xojeli, Taqıyatas hám Nókis rayon­larınan, jámi 125 bala dem alıp atır. Olarǵa 4 tárbiyashı hám 5 jetekshi basshılıq etedi. Balalardıń hár bir kúnin maz­munlı ótkeriwde barlıq shara­yatlar jaratılǵan,-dep bizlerdi dáslep kóshpeli kitapxanaǵa basladı. Bul kitap­xanaǵa Di­laram Ótemuratova hám Aysara Tóreniyazovalar basshılıq etip, bul jerde jámi 1058 ádebiy kórkem kitaplar hám respub­likamızdaǵı gazeta-jurnallar bar. Kitapxana janında bolsa, shaxmat-shashka, voleybol, futbol, basketbol, jeńil at­letika hám basqa da sport dóge­rek­lerinde óz waqıtların maz­munlı ótkerip atırǵan balalardı kórip, súysindik. Biz olardıń quwa­nıshına sherik bolıp, birazların sáwbetke tarttıq.

-Men Qońırat rayonınan keldim,-deydi Dáwlet Aman­baev. -Bul oray haqqında ótken jılı doslarım aytıp bergen edi. Bıyıl óz kózim menen kórip, sharayatlardıń zor ekenliginiń gúwası boldım. Ásirese, bas­seyinde ház etip shomılamız. Sport jarıs­la­rında belle­se­miz,-dedi ol.

-Maǵan bul jerdiń hawası hám hár qıylı dógerekler unadı. «Ayaq-oyın» dóge­re­gine qat­nasıp, oyın sırların úy­renip atır­man. Kitaplar meniń eń jaqın dos­larım. Kitap­xanadan hár qıylı qızıqlı ki­taplar alıp oqıp atırman. Orayda hár bir kúnim zawıqlı ótpekte,-deydi Xojeli rayonındaǵı 3-sanlı ulıwma bilim beriw mektebiniń oqıw­shısı Dúrdana Pir­na­zarova.

Bizler dem alıwshılar menen sáwbetlesip atırǵanımızda usı orayǵa basshılıq etip atırǵan Bekmurat Jumanazarov ta janımızǵa keldi.

-Balalar menen islesiw ushın hár qanday xızmetker eń birinshi náwbette balajanlı bolıwı kerek. Balalardıń qálbine qulaq túrip, olarǵa itibarlı hám mehirli bolıwı tiyis,-deydi oray basshısı.

-Orayǵa sportshılar menen ayaq-oyınshı oqıwshılar kelgen be,-deymen dep ol óz sózin dawam etti. Usı dógereklerge kópshiligi aǵza. Biz bunnan quwa­nıshlımız. Minekey, óz­lerińiz de oray sharayatların kó­rip, balalar menen sáw­betlesken shıǵarsız. Bárshesi de kewilli. Ele de mazmunlı ótkeriw ushın «Jas talantlılardı izleymiz», «Kewilli startlar», ««Aydın jol» malikası», «Jigitler sultanı» hám basqa da ilajlardı shólkem­lestiremiz.

Álbette, bul orayǵa kelgen hár bir balanıń júzinde quwa­nısh, shadlıq. Haqıy­qatında da, bul orayda kewilli dem alıp atırǵan balalarǵa jaratılǵan múmkinshiliklerden kewilimiz toldı. «Aydın jol»da jazǵı dem alısın kewilli ótkerip atırǵan balalardıń keleshegi álbette aydın boladı.

Ádilbek Latipov

QMUniń jurnalistika tálim baǵdarınıń 1-kurs studenti