Gúlnaz klasına tazadan kelgen qız benen birinshilerden bolıp sálemlesip, onı janındaǵı bos turǵan partaǵa mirát etti.

-Meniń atım Jasmina,-dedi sulıwshıqtan kelgen qız. Kiygen kiyimine, júris-turısına qarap bardamlı shańaraqtıń qızı ekenligin bayqaǵan Gúlnaz onıń menen jaqınnan doslasıp alıwdı oylap qoydı. Oqıwdan kóre kóbirek kóshede qıdırıwdı abzal kóretuǵın Gúlnaz ózine múnásip dos izlep júrgen edi. Sebebi, negedur klaslas qızları onnan ózlerin alıp qashatuǵın edi. Shınında da, oqıwǵa hesh ıqlası joq, tek ǵana janın­daǵılardı mudamı kemsitip, urısatuǵın menmen qız benen kim dos bolǵısı keledi?! Kempir apasınıń qolında tárbiyalan­ǵanlıqtan ba, onıń erkeligi basım, aytqan nársesin aldır­may qoymaytuǵın edi. Durıs, klaslas qızlar arasında onıń sońǵı modadaǵı kiyip júretuǵın kiyim­lerine, qol telefonına, plan­shetine háwes penen qaray­tuǵınlar da tabıladı. Degen menen, olardıń hesh qaysısı Gúlnaz benen dos bolıwǵa júreksinbeydi.

Gúlnaz Jasmina menen tez til tabısıp ketti. Hátteki, ajıralmastay doslarǵa aylandı. Jasminanıń da oqıwǵa qızıq­paytuǵınlıǵı qol keldi. Dostınan túngi waqıtları kafelerge barıp turatuǵınlıǵın esitkende ha­qıyqıy dostın endi tapqanday ushıp-ushıp quwandı. Sebebi, bazı da Gúlnaz da kafelerge barıp turatuǵın edi. Onday waqıtları kempir apasın klaslas dostısınıń tuwılǵan kúnin bánelep, kóp márte aldaǵan.

Kúnlerdiń birinde Jasmina sabaqta otırıp, bir dostısınıń tuwılǵan kúnine Gúlnazdı mirát etti. Tuwılǵan kún Nókistiń eń qımbat resto­ranında bola­tu­ǵınlıǵın ayttı. Restorannıń atın esitip Gúlnaz quwanıp qoya berdi. Olardıń gáplerin esitip otırǵan Aynura; «Ata-anańız barıwǵa ruqsat bere me?»-dedi tańlanıp. «Olardı baplap aldaymız-ǵoy, isenbeske de ilajı qalmaydı. Aqırı klass basshı­mızdıń ózi tuwılǵan kúnge baradı degen­nen soń, jibermey ne qıladı?!»-dedi Gúlnaz kúlip.

Kesh boldı. Eki dos mali­ka­larday bolıp jasanıp, restoranǵa keldi. Júzlerine boyaw súrtip alǵanlıqtan, olardıń 9-klass oqıwshıları ekenligine hesh kimniń isenbeytuǵınlıǵı anıq. Restoranǵa ózleri menen teńles, hátteki, biraz úlken jigit-qızlar jıynalıp, bázimdi baslap jiberdi. Tuwılǵan kún iyesi Jasminanıń burınǵı klaslas dostı Indira edi. Hátteki bázimge Indiranıń ata-anası, aǵayinleri de kelgen eken. «Tuńǵısh per­zenti bolǵannan keyin júdá erkeletip qoyıptı»-dep sıbır­ladı Jasmina dostın jaqınnan tanıstırıp. «Qánekey, meniń ata-anam da shet elde júre bermey meniń tuwılǵan kú­nimdi de usılay ótkerse?!»-dep Gúlnaz Indiraǵa háwes etip qoydı.

Bárshe ortada muzıkaǵa túsip, oyınǵa tús­pekte. Jasmi­nanıń «menıń dostım» dep tanıstırǵan bala Gúlnazdı aylanshıqlap, oynay berdi. Bunnan Jasminanıń ashıwı kelgenligin Gúlnaz onıń bozarǵan túrinen sezdi.

Tuwılǵan kún de tarqadı. Gúlnaz ushın bul kún eń umı­tılmastay kún boldı. Ási­rese, Jasminanıń dostı Azamat penen tanısqanına júdá quwanıshlı edi…

Bir kúni «Gúlnaz benen Jasmina tóbelesip atır»,-degen ǵap hádemey mektepke tar­qalıp, hámme tamashanı kó­riwge asıǵıp juwırdı.

-Nege tóbelesip atır?..

-Olar dos emes pe edi?..

-Jasminanıń sóylesip júrgen dostın Gúlnaz tartıp alıptı… Qızlar arasındaǵı sıpsıń gápler rasqa uqsaydı. Mekteptiń artında bir-biri menen tap ul balalarday ayqasıp atırǵan eki qızdıń awhalın kórip, bárshe tańlandı. Shashların julıp, hátteki betlerin de tırnap úlgergen bul qızlardıń keshe ǵana haqıyqıy doslar bol­ǵanlıǵına adamnıń iseniwi qıyın. Olardıń klass basshısı jetip kelmegende tóbeles qashanǵa deyin dawam ete­tuǵınlıǵı belgisiz edi.

Eki dostıń qılwaları ashılıp, ata-anaları mektepke sha­qırtırıldı. Olar qızları sebepli júzleri uyattan qızardı. Jas­minanıń ata-anası bolsa, qáytip bul dárǵayǵa keliwge arsındı ma, qızın basqa mektepke kóshirdi. Al, Gúlnaz jáne dossız qaldı…

Zuxra ISAKOVA

arnawlı xabarshımız