Negedur Dilbar ájapamnıń úyine tez-tez qıdırıp barǵım kele beredi. Sebebi, ájapam júdá kishipeyil, mehriban. Úyine qı­dırıp barǵan waqtımda shiyrin-shiyrin sózleri, mazalı awqatları menen sıylaydı. Hesh qashan dawısın kóterip sóyle­meydi. Múlayımlılıq pe­nen úyine kelgen miy­manǵa izzet-húrmet kór­setedi.

Jezdem Axmet Táji­muratov penen júdá tatıw turadı. Ol kórkem ónerge qızıǵadı. Na­malar, qosıqlar dóretedi. Olardıń Ráwshan, Rayxan, Ulbosın, Abadan ismli qızları bar. Ana qız bala ushın úlgi boladı eken. Ájapam qızlarına júdá jaqsı tárbiya berip atır. Úsh qızı mek­tepte oqıydı. Olar azanda erte turadı. Ata-anasına sálem be­redi. Úyiniń ishin, sırtın mintazday etip tazalap qoyadı. Biri asxananı tazalap, qazan-tabaqlardı juwsa, biri bólmelerdi tazalaydı, biri kirlerdi juwadı. Ákesi olardı ma­rapatlap, «meniń altın qızlarım» dep erkeletedi. Bir-biriniń ayt­qanların buljıtpay orınlaydı. Ul­bosın 1-klass bolsa da, gazlerdi, qoljuwǵıshlardı juwıp, tazalaydı. Ájapamnıń qızlarınıń sóylegen sózlerine, háreketlerine deyin, naǵız anasınıń ózi. Apam biz­lerge: -«Qızları bar úy azada bolıwı kerek!»-dep bárqulla es­kertedi. Sonıń ushın men de ája­pam­lardan kóp nárseni úyrenip atırman. Sebebi, keshte aǵam hám apam bizlerdiń islerimizdi kórip maqtaydı,-deydi kishkene Ulbosın.

Jezdem menen ájapam qızlarına bárqulla kitap satıp ákelip beredi. Ózleri de kóp kitap oqıydı. Sonlıqtan da qızlarınıń kitap penen jaqınnan dos bol­ǵanın qáleydi. Qızlarınıń barlıǵı da kitapqumar. Bizler kópshilik jaǵdayda oqıǵan kitaplarımız tuwralı pikirlesemiz, naqıl-ma­qallar aytısıp jarısamız. Ata-anası bizlerdiń bul háreketlerimizdi kórip qattı quwanadı. Bizlerdi xoshametleydi. Maǵan da úyine hár barǵanımda kitap sawǵa etedi. Men sonda úyge kewilli qaytaman. Usınday keńpeyil, miymandos jezdem menen ájapamnıń barlıǵına quwanaman.

Gúlnisa ASAMATDINOVA

Paytaxtımızdaǵı I.Yusupov atındaǵı mám­leketlik qáni­gelestirilgen mektep-in­ternatınıń 6-klass oqıwshısı