Xalqımızda ata-baba­la­rımız «Órt-tilsiz jaw» dep biykarǵa aytpaǵan. Ápiwayı ǵana itibarsızlıqtıń kesirinen kewilsiz hádiyselerdiń júz beriwi múmkin. Ayırım ata-analar úy átirapın tazalayman dep shıǵındılardı, ot-shóplerdi órtep jiberedi. Bul bir tárepten hawamızdı pataslap, adam densawlıǵına zıyan keltirse, bir tárepten órttiń payda bolıwına imkaniyat jarartadı. Ásirese, bunday hádiyseni kórgen bala, ata-anası joqlıǵında shıǵındılardı órtew arqalı úlken órttiń payda bolıwına alıp keledi.

Jaqında usınday waqıya Qońırat rayonı, «Qırıq qız» elatında jaylasqan xojalıq jaylarınıń birinde órt júz berdi. Onda turaq jay iyeleri 9 jasar qızı hám 7 jasar egizek balaları menen úyde qarawsız qaldırıp, ózleri bazarlaw ushın shıǵıp ketedi. Balalar dalada oynap júrip, úy qaptalında turǵan quwraǵan shóplerdi órtep tazalap qoymaqshı boladı. Bul isi ushın ata-analarınan maqtaw esitemiz dep oylaydı. Biraq, olardıń bul oyı hám oyını oymaqqa aylanıp, quwraǵan shópler lawlap janıp, tezlik penen mal qora janındaǵı jıynalıp turǵan sabanǵa da jetedi. Balalar qorqıp úyine qaray qashadı. Ot iysin sezgen qońsısi, dárhal sırtqa shıǵip qaraydı. Law­laǵan ot qara tútin bolıp joqarılap atırǵanın kórip, tezlik penen sol aymaqta jaylasqan Órt qáwipsizligi bólimine qońıraw etedi. Tez arada «Uz-Kor Gas Che­mikal» MChJ QK hám oǵan qaraslı obiektlerdi órtten qorǵaw boyınsha órt qáwip­sizligi bólimi xızmetkerleri óz waqtında jetip kelip, órtti óshiredi. Olar balalardı úyden alıp shıǵıp, bir shańaraqtıń perzentlerin aman saqlap qaladı.

Qádirli balalar! Eger de, sizler úyde jalǵız qalǵan waqtıńızda usınday kewilsiz hádiyselerdi boldırmaw ushın shırpı, elektr hám gaz úskenelerinen paydalanbań.  Jası úlkenlerdiń aytqanlarına qulaq salıp, órt qáwipsizligi qaǵıydalarına ámel etiwińizdi soranamız!

T.GABBAROV

«Uz-Kor Gas Chemikal» MChJ QKǵa qaraslı obiekt­lerdi órtten qorǵaw boyınsha órt qáwipsizligi bólimi órt qadaǵalaw hám profilaktikası inspektorı úlken serjant