Jaqında paytaxtımızdaǵı «Jaslar orayı»nda «Hár bir jas, bir kitaptan» akciyası shólkemlestirildi. Eń birinshilerden bolıp akciyaǵa Qaraqalpaqstan Respublikası orta arnawlı kásip óner basqarmasınan 300 kitap jetip keldi. Bunnan soń, joqarı oqıw orınları, Jazıwshılar awqamı hám mámleketlik emes shólkemlerden  eki saat ishinde 3000nan artıq kitaplar jámlendi. Bul ele baslanıwı, akciya ele dawam etedi. Akciyaǵa 15000ǵa jaqın kitaplardı toplaw hám tarqatıw rejelestirilgen.

«Bes baslama-bes múm­kinshilik» uranı tiykarındaǵı ilajlardıń barlıq qala hám rayonlarda óz waqtında tá­miyinlew maq­setinde Ózbekstan Jaslar awqamı Qara­qalpaqstan Respublikalıq Keńesi qáni­geleri, aymaqlıq Keńes­ler jumısların je­dellestiriw hám olarǵa ámeliy járdem beriw ushın biriktirildi. Hár hápteniń ju­ma hám shembi kúnleri úgit-násiyatlaw ilajların shól­kemlestiriw jolǵa qoyıldı.

-Bul akciya jaslardıń ózleriniń baslaması menen shólkemlestirildi. Bir kúnniń ózinde sonsha kitap jıynaldı. Ele de kitaplar jıynalıwı dawam etip atırǵanlıǵın joqarı oqıw orınları jetek­shileri aytpaqta. Olar ara­sında sabaqlıqlar, qara­qalpaq, ózbek, jáhán áde­biyatları hám balalarǵa arnalǵan hár qıylı temalar­daǵı eń sońǵı basılımlarda shıqqan kitaplar orın alǵan. Usı akciyada Moynaq rayonı jaslarına 1200 kitap inam etildi. Ulıwma toplanǵan kitaplar Res­publikamızdıń eń alıs rayon hám awıllıq jerlerindegi oqıwshı-jaslarǵa tar­qatıladı,-deydi Óz­bekstan Jaslar awqamı Qaraqal­paqstan Respublikalıq Keńesi bas­lıǵınıń orınbasarı Biybijan Aralbaeva.

Bunday ilaj hám itibardan álbette, kitapqumar jas­la­rımız júdá min­net­dar bolıp, ruwxıy baylıǵın joqarılatıp baratuǵını sózsiz.

Klara XUDAYBERGENOVA

Respublikalıq Jaslar orayı Qaraqalpaqstan bólimi baspasóz xatkeri