Keshe ǵana ana mektebine qádem atlaǵan náwshe gúlleri búgin qanat qomlap ushıw aldında tur. Hátteki, olardıń er jetip kámalǵa kelgenligin ata-anaları da, ustazları da bayqamay qalǵanday. Waqıt aǵar dárya kibi tasqınlap tez ótip atır. Pitkeriwshiler onbir jıl dawamında bilim alıp, ómirge qádem taslap, belgili bir kásipti tańlaw ushın joqarı oqıw orınlarına tapsıradı. Biz Respublikamızdaǵı ulıwma bilim beriw mektepleriniń bir qatar pitkeriwshileri menen sáwbette bolıp, keleshektegi rejeleri haqqında ortaqlastıq.

Malika Genjemuratova-Qa­raózek rayonındaǵı 15-sanlı ulıwma bilim be­riw mek­tebiniń pit­ke­riwshisi. -Ekinshi úyimiz esap­lan­ǵan ana mekte­bi­miz­ge de bawır basıp qalıp­pız. Bul dár­gaydı tárk etiw júdá qıyın bolıp atır. Us­tazlarımız bolsa, hár biri­mizdiń tereń bilim alıwımız ushın ayanbay xızmet etti. Ásirese, biologiya páni muǵallimim Gúlzar Reymovanıń sabaqları meni shıpaker kásibin tańlawǵa sebepshi etti. Sebebi, bul kásipti iyelew ushın biologiya hám ximiya pánin jaqsı úy­reniwimiz  kerek. Álbette, hár qanday kásipti tańlawda barlıq pánlerdi tereń meńgeriwimiz lazım. Keleshekte shıpaker bolıp, adamlardıń sala­mat bolıwına óz úlesimdi qossam deymen. Maǵan baǵdar bergen bárshe ustazlarımnan júdá-júdá min­netdarman. Olardıń miynet­lerin aqlawǵa wáde beremen.

Aydos Adir­be­kov-Nókis rayon­ındaǵı 10-sanlı ulıwma bilim be­riw mektebiniń pit­keriwshisi. -Mek­tep-bul altın bosaǵa. Usı dárgayǵa kelgende kishkene bala edim. Mek­tepti qashan pit­kere­men, qashan úl­ken bolaman, dep oy­laytuǵın edim. Waqıttıń ót­kenin de bilmey qaladı ekenseń. Búgin bizler mektepti pitkeriw aldında turmız. Endi qanat qomlap, ana mektebimizdi tárk etemiz. Hár birimiz óz­lerimiz tańlaǵan kásibimiz boyınsha joqarı oqıw ornına tapsırmaq­shımız. Hár qanday kásipti tańlawda  álbet­te, ustaz­ları­mızdıń bergen bilimleri nátiy­jesine isenemiz. Sonlıqtan, barlıq muǵal­limlerime alǵıslarım sheksiz!

Biybimáryam Nurat­dino­va-Nókis qalasındaǵı 31-sanlı mámleketlik qánigeles­tirilgen ulıwma bilim beriw mekte­biniń pitkeriw­shisi. -25-may ja­qın­laǵan sayın jú­regim dúrsil­dep, ózimdi bir túrli sezip atırman. Sebe­bi, waqıttıń ótiwi dem­de eken. Muǵallim­lerimiz bizlerge bilim hám mehir­ berip, jarqın keleshekke jeteledi. Qarań, mámleketimiz biz jas áwladlarǵa tálim-tárbiya beriwde qan­shadan-qansha imkaniyatlardı jaratıp berip atır. Men inglis tiline qızıqqanlıǵım sebepli «Bilimliler bellesiwi» hám «Pán olimpiada»larına qatnasıp, jeńim­paz boldım. Biyılǵı oqıw jılında da inglis tili páninen «Pánler olimpiada»sında, Qa­raqal­paqstan Respublikalıq basqı­shına  bel­sene qatnastım. Bunda maǵan pán muǵallimim Zulfiya Reyp­naza­rovanıń miyneti úlken boldı. Keleshekte dilmash kásibin tańlap, shet elli saya­xatshılarǵa ana diyarımızdıń tariyxın túsindirsem deymen.

Atabek Erkebaev-Pay­taxtımızdaǵı 31-sanlı mámle­ketlik qánigelestirilgen ulıwma bilim beriw mekte­biniń  pit­keriw­shi­si. -Ana mek­tebim-ekinshi úyim, ustaz­larım ekin­shi ata-anam. Bul haqıyqat. Bilim alǵan dár­gayı­ma qattı ba­wır basıp qalǵan eken­men. Klass bas­shımız Salima Uzaqova bizlerdiń bir tárepten ustazımız bolıw menen birge, másláhát­góyimiz, súye­ner asqar tawımız boldı. Sebebi, barlıq sırlarımızdı oǵan erkin emin ayta aldıq. Qansha shoqlıq etsek te bárin kóterip, ata-anamızday er­keleter edi. Bul ustazımızdan klasımız oqıwshıları atınan shoqlıqlarımız ushın keshirim sorayman. Endi bul shoqlıqlar joq. Er jetip úlkey­genimizdi de bilmey qaldıq. Muǵallimlerimiz shınında da ómir baǵmanı. Orıs tili hám ádebiyatı pánine Gúlnaz Abato­va mu­ǵallimim qızıqtırdı. Son­lıqtan, bıyılǵı «Pánler olimpia­da»sınıń Qara­qalpaqstan Res­publikalıq bas­qıshında 1-orındı iyelep, Óz­bekstan basqıshına jollama aldım. Házirgi waqıtta ustazım menen birgelikte tayarlanıp atır­man. Gúlnaz muǵallimim meniń keleshekte dilmash bolıwıma baǵdar bere aldı. Álbette, onıń miynetlerin aqlawǵa háreket etemen.

Áziz klubımızdıń ıqlas­bentleri! Bizler de óz ge­zeginde aydın jollardı gózlep atırǵan pit­keriwshilerge haq jol tileymiz! Keleshekte joqarı oqıw orın­larında tereń bilim alıp, óz mamanlıǵı boyınsha pitkerip, hár biri elimizdiń gúllep rawaj­lanıwına úles qosadı degen niyettemiz!

Klubqa náwbetshilik etken: J.IBADULLAEVA