Men ótken jılı jazǵı dem alısta awılǵa barıp ház etip dem alıp qayttım. Awıldaǵı atamnıń úyinde úyimizde ájayıp baǵ bar. Onda túrli jemisli miyweler uwıljıp pisedi. Miywelerdi jıynawǵa kómek beremen.

Bir kúnleri bir qızıq waqıya boldı. Baǵqa awıldaǵı ayırım qoy-eshkiler kirip kete bere­tuǵın edi. Bizler Miyratdin menen almalardı aǵash qu­tılarǵa jayǵastırıp atır edik. Jigir­ma­laǵan qoy-eshkilerdi zordan baǵdan quwıp shı­ǵardıq. Olardıń iyesi de alıstan tayaǵı menen juwırıp kiyatır eken. Ol biz­ler­den keshirim sorap, qoy-eshki­lerin alıp ketti.

Erteńine baǵqa barsaq adamlar bir alma daraqtıń qasında úymelesip tur eken. Ne boldı eken dep, juwırıp bardıq. Qarasaq, daraqtıń basında bir eshki mańı­rap tur. Bárshe adamlar «Bul eshki qalayınsha daraqtıń basına shıǵıp aldı?»-dep hayran qalı­sıp turǵan eken. Aǵash qutılar bolsa, jerde shashılıp jatır.

-Keshe men aǵash qutılardı dizip jıynap ketip edim. Onda ol daraq­taǵı al­malardı jew ushın aǵash qutılarǵa sekirip mingen ǵoy,-dedi hawlıǵıp Miyratdin.

-Solay bolıw kerek, bol­masa eshki tuyaǵı menen daraqqa órmelep shıǵa al­maydı. Eshki de túni menen qorıqqanınan uyqılay al­maǵan shıǵar,-dedi olar hám miywe daraqqa, hám eshkige rehimi kelip.

Baǵman atam balalarǵa bunday shala is qáytip tá­kirarlamawın ayttı. Soń, barlıq adamlar esh­kini záńgi ákelip, jerge túsirip aldı. Bir waqıtta eshkisin joyt­qan aǵay da jetip kelip, keshirim sorap, eshkisin alıp ketti. Sol payıtta awıldaǵı bir adam:

-Endi eshkińe bir hápte ot-jem bermeseń de boladı. Bir daraq almanı túni menen jep gúpli bolǵan,-dep házil­lesti.

Solay etip, awılda usınday qızıqlı waqıyanıń gúwası bolıp qayttım.

Sawlat SEYTMURATOV

Nókis qalasındaǵı 23-sanlı ulıwma bilim beriw mek­tebiniń 8-klass oqıw­shısı