Yusupbay Álimbetov

(povestten úzindi)

Teleoray bettegi shetlew kóshelerdiń birine kóship kelgenimizge de biraz jıllar bolıp qaldı. Dáslep, inim Ájimurat ekewi­mizdi bul jerge ákem ertip kelip: -Al, ballarım, bizge tap usı jerden jer plan tiyisti.

Onıń bul kóterińki keypiyatın bizler qayaqtan túsinemiz?! Ol waqta kishkentaymız. Meniń ekinshi klasqa ótken, al inimniń birinshi klasqa oqıwǵa baratuǵın jılı edi. Onıń ústine, endi yadıma túsirsem, júdá bir quwanǵanday hesh nárse joq eken-aw! Qula maydan, ısıldaǵan qum. Onnan armanıraǵı aqbas, jantaq. Jáne, armanıraǵınıń duzı shıǵıp, bılshırap atır. Qarabaraqtan basqa zat joq. Házir ǵoy, bári ótiriktey. Qatar-qatar kóshe. Juldızday jay. Aǵamnıń jer jayǵa ajıratılǵan planınıń bunshelli sátli keliwine kewliniń xosh bolıwınıń sebebin soń-soń bilip atırmız. Qansha aytqan menen, jerdiń ayaq betinen, úlken jol betten birtalay jerge iyelik etiw imkaniyatı bar eken.

Aǵam júdá ayta qalarlıq ustashılıǵı bolmasa da, jay salıwǵa uqıbı bar edi. Bul jerge kelip, jayǵa aynalıspastan eki jıl burın inisiniń jayın órisip  hám ústin bastırıp, shiferlap ta bergen.

Hár hápteniń dem alıs kúnlerin hámmemiz-aǵam, apam, kempir apam, azannan baslap, al, Ájimurat ekewimiz tústen keyin sabaqtan shıǵa  jay bette bolatuǵın edik. Dáslep aǵam inisi ekewi jaydıń tırnaǵın quyıwǵa kiristi. Álbette, ekewine bul is awırlıq etetuǵın edi. Birge islep atırǵan eki-úsh jigitke kómek aytıp, onı zorǵa pitkerdi. Izli-izinen úlken «KamAZ» mashina tolı topıraqlar tógilip, bunnan soń, inisi ekewi gerbish quyıwǵa kiristi. Apam ılaydı zuwalalaydı, aǵam tez qálipke salıp, qatara tóńkerip taslap kele beredi. Bizler isleytuǵın jumıs quyılǵan gerbishler sorıǵıwdan, olardı tikeytip shıǵıw. Soń, gerbish jıynawdı baslap edik, aǵam ruqsat etpedi.

-Bul jumıstı úlkeyińkiregennen soń isleysiz. Házirshe sizler dógerek-dashtı úyrene beriń. Keleshekte jaydıń qayaǵına qanday daraq egemiz? Qáne, oylanıń, balalarım.

Ol sonı ayttı da, bizler menen  kóp isi bolmastan apam ekewi gerbish quyıwın dawam ete berdi. Onnan sońǵı demalıslarda aǵamnıń inisi Tilewmurat ájaǵam kishem menen kelip járdemlesip turdı. Báribir ańsat bolmadı. Taǵı bayaǵı tırnaq quyısqan jigitlerge kómek ayttı. Jumıs biraz jedellesti hám shaması, bes qat jayǵa naq jetetuǵın otız bes mıń gerbish te tayar boldı. Bul jumıs toqtadı. Aǵam Tilewmurat ájaǵam menen oylastı: -Ne qılsaq eken? Tırnaqtı qaramaylap, gerbish qalawdı baslay bersek pe eken?

Tilewmurat ájaǵam shırtıldaqlaw. Aǵamnıń gápin bólip jiberdi:

-Ájaǵa, baslamasaq bolmaydı. Ekewimiz de miynet demalısına shıǵayıq. Kún demey, tún demey islew kerek.

Aǵam biraz sabırlılıq penen ún qattı:

-Tilewmurat, sendey mehriban inimniń bolǵanına júdá quwanaman. Kewlim toq.

(Dawamı bar.)