Respublikalıq Jaslar orayı Qaraqalpaqstan bólimi direktorı Polat Maqsetbaev Xojeli rayonındaǵı «Mehribanlıq úyi»nde shólkemlestirilgen orıs hám inglis tili dógerekleri oqıwshıları menen ushırasıp, sáwbetlesiw ótkerdi.

-Jaqında men Samarqand qalasında ótkerilgen «Qız­larjan» klubınıń sammitine qatnastım. Registan may­danında bizlerge berilgen óz qol miy­net­lerin satıw shártlerin shet elli saya­xat­shılar menen sóy­lesip, joqarı dárejede orınladım. Bizlerdiń «Mehribanlıq úyi»mizdegi orıs hám inglis tilleri dó­gerekleri bizlerge júdá unaydı. Qáne edi, basqa da shet tilleri, ásirese, francuz hám nemis tili dógereklerin ashıp berse eken,-deydi «Meh­ribanlıq úyi» tárbiyalanıwshısı Rano Karamova.

Haqıyqatında da, bul ushırasıw balalarda ayrıqsha unamlı tásir qaldırdı. Balalar úyi tár­biyashıları óz usınıs hám tileklerin bildirdi. Ushırasıw sońında Jaslar orayı Qara­qalpaqstan bólimi tárepinen dógerek aǵzalarına Jaslar orayı logotipi túsirilgen futbolka hám kepkalar sawǵa etti.

Klara XUDAYBERGENOVA

Jaslar orayı Qaraqal­paqstan bólimi jas jurnalistler bólimi baslıǵı