Usı jıldıń 26-27-28-aprel kúnleri Ózbekstan Jaslar Awqamı Qaraqalpaqstan Respublikalıq Keńesi hám onıń orınlardaǵı bólimleri tárepinen respublikamızdıń qala hám barlıq rayonlarında Prezidentimizdiń áhmiyetli Bes baslamasınıń orınlanıwına baǵdarlanǵan ilajlar shólkemlestirildi. Nókis qalası hám rayonlarda Bes baslamanı keń jámiyetshilikke úgit-násiyatlaw, olar haqqında puxaralardıń xabardarlıǵın arttırıwǵa baǵdarlanǵan joybarlarǵa jámlespegen jaslar qamtıp alındı.

Bes baslamanı alǵa súrgen ilajlar Ellikqala rayonında tań sáhárden jaslardıń dene-shınıǵıwları menen baslandı. Hár qıylı seminarlar, dóń­gelek stol átirapındaǵı sáwbetler, sport jarısları jaslar jetekshileri tárepinen dawam ettirildi.

Sonıń menen birge, Bes baslamanı úgit-násiyatlawǵa arnalǵan «Men bolmaqshıman», «Qádirdan mekte­bime kitap sawǵa etemen», «Perzen­time kitap sawǵa», «Jaslar hám nı­zam», «Bilimdanlar» temalarında in­tellektual oyınlar, hár qıylı sport túrlerinen jarıslar, tábiyat qoynında súwretshilik óneri, málimleme texno­logiyaları hám kitap­qumarlıq ilajları, muzıkalıq hám teatr tama­shaları, milliy kórgizbeler Moynaq, Qońırat, Qanlıkól, Sho­manay, Shımbay, Tórtkúl, Beruniy, Ámiw­dárya, Qara­ózek, Xojeli, Taxtakópir, Nókis rayon­larında ótkerilip, olar arqalı belsendi hám jámlespegen jaslardı mám­leke­timizdiń gúllep-jasnawı jolında bar kúsh-ǵayratın jumsawǵa shaqırdı.

Bes baslamanıń jáne bir áhmiyetli baǵdarı esaplanǵan hayal-qızlar bántligin támiyinlew boyınsha ulıwma bilim beriw mektepleriniń pitkeriwshi qızları qatnasıwında «Biznes sayaxat»lar hám sport jarısları shólkemlestirildi. Atap aytqanda, Xojeli rayonında  «Salamat ana-salamat bala» sport jarısı, Qońırat rayonındaǵı Qońırat sanaat kolledjinde tigiw-trikotaj boyınsha sheberlik sabaqları ótkerilip, ilajlarda belsene qatnasqan jeti hayal-qızǵa tigiw mashinaları beriliwi belgilep alındı.

Prezidentimizdiń áhmiyetli Bes baslaması sheńberindegi ilajlar qala hám rayonlarda ele dawam etpekte.

Indira MÁMBETNAZAROVA

Jaslar awqamı Qaraqalpaqstan Res­publikalıq Keńesi baspasóz xatkeri