-Úyimnen mektepke she­kemgi bir saat waq­tımdı jolǵa sarplaytuǵın edim. Mektepten úyge she­kem jáne sonsha jol jayaw qaytaman. Úyimiz benen mekteptiń aralıǵı 5 kilo­metr shıǵadı. Sol kúni úyime mektepten kelsem, Ózbekstan Jaslar Aw­qamı Tórtkúl rayonlıq Keńesi qánigeleri bizlerge sawǵaǵa velosiped alıp kelipti. Óz kózime ózim isen­bedim. Qattı quwanǵanımnan olarǵa ne dep aytarımdı da bil­me­dim. Úkelerimniń quwan­ǵanın ayt­paysız ba?! Sonlıqtan, úke­lerimniń hám ózimniń atımnan bizlerge ǵamxorlıq etip usınday ájayıp sawǵa bergeni ushın Jaslar awqamı rayonlıq Keńesi xızmet­kerlerine raxmet ayta­man,-deydi tolqınlanıp rayon­daǵı «Aq­qamıs» awıl puxa­raları jıyınındaǵı 26-sanlı ulıwma bilim beriw mekte­biniń 5-klass oqıw­shısı Adambay Tó­remuratov.

Jaslar awqamı qánigeleri rayon­daǵı eń alıs awıl­lardıń biri «Aq­qa­mıs»ta jasawshı baǵıwshı­sınan ayırıl­ǵan Adam­bay Tóremu­ratov, Xawajan Tóre­muratova hám Dúrdana Roma­novalardıń halınan xabar alıp, olarǵa ájayıp sawǵalar tapsırdı. Bul balalar aldın mektepke barıw hám qaytıw ushın 2 saat waqıt sarplaytuǵın bolsa, endi 10 minutta ve­losiped penen mektepke qatnaytuǵın boldı.

Klara XUDAYBERGENOVA

Jaslar orayı Qaraqal­paqstan bólimi jas jurnalistler bólimi baslıǵı