Húrmetli balalar! Futbol-millionlar súygen oyın. Bul oyındı ómirinde bir rette bolsa oynap kórmegen, qandayda bir futbol komandasınıń ıqlasbenti bolmaǵan insan bolmasa kerek. Sizlerdiń arańızda da «Real Madrid» yamasa «Barselona»ǵa, «Paxtakor» yaki Nókisimizdiń «Aral» komandasına ıqlasbentler mıńlap tabılatuǵınlıǵına isenemiz. Bul komandalarda oynaǵan juldızlarǵa eliklep, olar haqqındaǵı maqalalar, súwretlerdi qásterlep jıynap júretuǵınıńızda tábiyǵıy halat. Solay eken biz gazetamızdıń usı sanınan baslap «Meniń juldızım» rubrikasında dúnyanı dúr silkindirgen futbolshılar haqqında maqalalardı izbe-iz berip baramız. Demek biziń búgingi miymanımızdıń atı ápsanaǵa aylanǵan braziliyalı futbolshı-GARRINCHA.

REDAKCIYA

Haqıyqıy atı-Manoel Fransisko dos Santos. Laqabı-Garrincha. Braziliyanıń Pau Grande qalasında 1933-jıl 18-oktyabrde tuwılǵan. Shańaraǵı júdá kámbaǵal edi. Sonlıqtan, qarshadayınan qara miynettiń arqasında ósti. Bolajaq ullı futbolshı ata-anasına járdem beriw ushın barlıq nárseni isledi. Toǵayda jabayı miywelerdi terip, hátteki, sońında bazarǵa alıp barıp sattı. Bir yarım jıl mektepte oqıǵannan keyin, fabrikaǵa jumısqa kirdi. Fabrika qasında kishigirim stadion bar edi. Oyınlardı tamashalawǵa kelgen ıshqıpazlar Manoeldiń kútilmegen tezligine, ko­mandalasına jetkerip bergen yamasa, dárwaza torına túsirgen tobına tańlana qarap baha berdi. Ásirese, onıń qarsılasların lal qaldırıp aldap ótiwleri oyınǵa ózgeshe lázzet baǵıshladı. Ol bul oyınları arqalı oń qanat hújimshisi wazıypasında pisip jetilisti.

Garrincha 13 jasında pútkil okrugtıń eń jaqsı futbolshısı boldı. 16 jasında bolsa «Pau Grande» háweskerler klubınıń eresekler komandasında oynay basladı. Biraq, Bra­ziliyada talantlı jaslar júdá kóp bolǵanlıqtan, olardıń eń áwmetlileri ǵana ómirden óz ornın tawıp ketedi. Oǵan belgili bir sebep te kerek. Garrincha ushın bunday áwmet «Botafago» klu­bınıń burınǵı zapastaǵı dárwa­zamanı «Pau Grande»nıń oyın­larına tóreshilik etiwge kelgeni menen baylanıslı boldı. Manoeldiń oyının kórgen Arati onı dárhal Rio-Janeyroǵa alıp ketedi. Arati Garrinchaǵa onıń ómirinde birinshi bolıp futbol kiyimi hám butsi alıp beredi.

Jas Garrinchanıń «Bota­fago» jıyın­la­rındaǵı dáslepki shınıǵıwları ápsanaǵa ay­lanǵan. Oyın shınıǵıwların baqlap turǵan ıshqıpazlar Garrinchanıń maydanǵa tú­si­wine biypárwalıq penen qaraydı. Hátteki, trener Jentil Kar­dozanıń ózi de oǵan iseniń­ki­remey Arantidiń húrmeti ushın Manoeldi sınap kóredi.

Ádettegidey oń qanattan orın alǵan Manoelden trener qorǵawshını qalay alday alıwın kórsetiwdi soraydı. Qorǵawshı kimseń-«Bota­fago» klubı hám Braziliya saylandı koman­dasınıń je­tekshi oyınshısı Nilton Santos edi. Biraq, Gar­rincha hesh tartınbastan bir jup fintti ámel­ge asırıp toptı Santostıń ayaǵı arasınan ótkeredi de qorǵawshıdan ótip ketip top­qa jetip baradı. Ataqlı futbolshı Santos oǵan jetip almaqshı bolıp qayı­rıl­ǵanında teńsalmaǵın saqlay almay qolaysız jıǵılıp túsedi. Tribunaǵa jıynalǵan ala­mannıń bári kúlip jiberedi.

„ázeplengen qorǵawshı bul halattı jáne tákirarlawın soraydı. Garrincha eki ret bul fintti jeńil tárizde orınlaydı. Shınıǵıwlardan keyin málim bolıwınsha jas futbolshı sol waqıtta kimdi «shırgúbelek» aldap júrgenin de bilmegen eken. Ashıq kewilli Nilton onnan hesh qanday qapa bolmay, trenerden Garrin­chanı óziniń koman­dasına alıwın soraydı.

Garrincha kóp ótpey usı koman­danıń hám Braziliya saylandı koman­da­sınıń juldız hújim­shisine aylanadı. Futbol karolı Pele menen birge óz Watanın birinshi márte Jáhán chem­pionına  aylandıradı.

Ómiri dawamında ózi oynaǵan klublardı hám mámleketin dúnyaǵa ta­nıtqan, bir neshshe márte jáhán chempionı bolǵan Garrincha táǵdirdiń kóp ǵana soqqılarına da duwshar boldı.

1984-jılı «Botafago» sta­dionına onıń atı berildi, sol jılı Braziliyanıń bas stadionı «Marakana»da Manoeldiń byusti ornatıldı. Kóp ǵana dereklerde ol dúnyanıń eń kúshli on futbolshısı qatarına kiredi.

Baspasóz hám internet materialları tiykarında tayarlaǵan

A.QUDAYBERGENOV