Qádirli balalar! Sizlerdiń barlıǵıńız qızılsha keselligi haqqında esitken bolsańız kerek. Bul kesellik balalar arasında júdá kóp ushırasadı. Dúnya júzinde qızılsha menen kesel­leniwshilik dárejesi páseymekte. Degen menen, bul kesellik juqpalı kesellikler arasında balalar ólimshiligine alıp keliwshi tiykarǵı sebeplerdiń biri bolıp qalmaqta.

REDAKCIYA

5 jasqa she­kemgi balalar ólimshiliginiń 10 procenti qızılsha ke­selligine tuwra keledi. Dúnya júzilik Densawlıqtı saqlaw shól­keminiń bergen maǵlıw­matlarına qaraǵanda, qızıl­shaǵa qarsı shanshıw menen 80 procent kontingent qam­tıp alınsa da, hár jılı qı­zıl­shadan bir neshe mıń adam­lar nabıt boladı. Qızılshaǵa qarsı keselleniwshilik jaǵ­daylarınıń eń aqırǵı epi­demiyası 1998-1999-jıllar esaplanadı.

Keyingi waqıtları qızılsha menen keselleniwshilik jaǵ­dayları 10 jastan ótken balalar arasında kóbirek ushıraspaqta. 2002-2003-jılları Ózbekstanda bul kesellik penen nawqas­lanǵanlar sanı 3200 balanı quradı.

Usı keselliktiń aldın alıw boyınsha Ózbekstan Respub­likası Densawlıqtı saqlaw Ministrligi tárepinen stra­tegiyalıq baǵdarlama qabıl etildi hám orınlandı. Qızıl­shaǵa qarsı shanshılmaǵan balalardıń táǵdiri awır aqı­betlerge alıp keliwi múmkin. Jáne de basqa da keselliklerge shatılıw qáwpin tuwdıradı. Bunday keselliklerden aman qalǵan balalar ómirlikke mayıp bolıp qaladı. Barlıq balalar qızılshaǵa qarsı shanısh­tırıwları shárt. Sebebi, qızıl­shanıń shıǵıwı balanıń aqılı kemis bolıp rawaj­la­nı­wına, sonday-aq, esitiw hám kóriw qábiletiniń páseyiwine alıp keliwi múmkin.

Bala qızılsha menen awırsa tómendegi belgiler payda boladı: balanıń tempe­raturası kóteriledi, onıń júzine hám denesine tas­palar shıǵadı. Bunday jaǵday úsh kún hám onnan kóbirek waqıt dawam etiwi múmkin. Sonıń menen birge jóteledi, murnı aǵadı hám kózleri qızarıp ketedi.

Eger, siz ózińizde usınday kesellik belgilerin sezseńiz, dárhal ata-anańızdı xa­bardar etiń! Olar óz náw­betinde shıpakerler menen birge qızılshaǵa qarsı gúresip siziń densaw­lıǵıńızdı saqlap qaladı. Al, salamat deneli, ozıq oylı perzentler bárqulla elimizdiń keleshegin bel­gileydi.

M.ÚBBIEVA

Nókis qalalıq 4-sanlı shańaraq poliklinikasınıń shıpakeri