Ele esimde, ol waqıtları mektepke barmaǵan edim. Sol kúni atam: -«Qá­ne, tınısh otırıń. «Xabar»dı esiteyin»,-dep televizordıń dawısın shıǵardı. Hámme­miz tım-tırıs otırmız. «Xabar» baǵdar­laması tamam boldı.

-Ata, adamlar televizorǵa qalay kiredi,-dedim qızıqsınıp.

-Qızım, mek­tepte jaqsı oqısań, bilimli bolsań, ál­bette, sen de tele­vizordıń ishine kire alasań,-dedi atam sha­shımnan sıypap. Áne, sonnan baslap tele­vizordan shıqqan kór­setiwlerdegi alıp barıw­shı, baslawshı qızlarǵa itibar berip qaraytuǵın boldım. Kiyimlerine, shash­larına, sóy­legen sóz­lerine háwesim ke­ledi. Mektepke bar­may atırıp-aq ájaǵa-ájapalarımnıń ruchkaların alıp aq qaǵazdı shıj­baylayman. Bir kúni aynaǵa qarap ózimshe: -«Sálem, balalar! Men, men baslawshıman…» dep sóylep tur­ǵanımda, atam ishke kirip keldi. -Me­niń qızım diktor boladı,-dep erkeletti.

Mine, aradan jıllar ótti. Men házirgi waqıtta paytaxtımızdaǵı I.Yusupov atındaǵı mektep-internattıń 6-klasında oqıp atırman. Ótken jılı «Qaraqalpaq­stan» televideniesiniń «Balalar dúnyası» kórsetiwine mirát etildim. Sondaǵı quwanǵanımdı aytpaysız ba? Til menen aytıp jetkere almayman. Eń dáslepki ret televideniede sóylegenimde qattı albıradım. Ózimdi basqa dúnyaǵa kirip qal­ǵanday sezdim. Albırap ján-jaǵıma qaray berdim. Sonda Shiyrin apa maǵan: -«Albırama, ózińdi usla, qáddińdi tik tut, sen epley alasań, jaqsı sóyleyseń»-dep marapatlap qoydı. Sonda da albıraǵanımnan dawısım bir shıǵıp, bir shıqpay atır.

-Gúlnisa hesh albırama ekranda sonday sup-sulıw qız sóylep atır,-dep meni xoshametledi Zamira apa.

Mine, meniń televideniege atqan tuńǵısh qádemim usılay baslandı.

Men házirgi waqıtta «Balalar dúnyası» kór­se­tiwiniń «Kitap-biziń dostımız» rubri­kasın alıp bara­man. Bul maǵan birinshiden kóp izlenip, kóp kitap oqı­wıma sebepshi bolsa, ekinshiden kóp doslar arttırdım. Men bunnan tısqarı bos waqıtlarımda «Jetkinshek» gazeta­sına maqala, qosıq, ertekler jazıp qatnasıp turaman. 2019-jıl ushın jazılıw mapazında birin­shilerden bolıp «Jetkin­shek» ke bir jılǵa jazıl­dım. Klaslas doslarım Anisa Kárimbaeva, Iroda Durna­zarovalar menen birgelikte redak­ciyaǵa jiyi-jiyi barıp turamız.

Televideniedegi ustazlarım Shiyrin apa Azizova, Zamira apa Nawrız­baevalarǵa kóp-kóp raxmet aytaman.

Áziz doslar! Televidenie, radio, gazeta-jurnallar bul bizlerdiń ruwxıy dúnyamızdıń bayıwına paydasın tiy­gizedi. Kóp kitap oqıwǵa iyter­meleydi. Kámil, bilimli jaslar bolıp jetilisiwimizge tiykar jaratadı. Sonlıqtan, gazeta, kitap oqıwdan jalıqpań!

Gúlnisa ASAMATDINOVA

Nókis qalasındaǵı I.Yusupov atındaǵı mámleketlik qánigeles­tirilgen mektep-internatınıń 6-klass oqıwshısı