Respublikalıq Jaslar orayında xalıqaralıq shól­kemler menen birgelikte «Araldı qutqarayıq!» ata­masında ilimiy konferenciya ótkerildi.

Konferenciya qatnasıwshıların Respublikalıq Jaslar orayındaǵı «Ayaq oyın» dógeregi aǵzaları qaraqalpaq milliy ayaq oyınları menen kútip aldı. Oraydaǵı texnikaǵa qı­zıǵatuǵın balalar arasında master-klass ótkerildi. Bunda «Makerspace Almaty» laboratoriyasınıń jetekshi koordinatorı Aziza Ibragimova balalar ushın qızıqlı texnikalıq shınıǵıwlar ótkerdi.

-Sizlerdiń jasaw sharayatıńızda kóp ashılıwlar islewge boladı. Máselen, ápiwayı samaldıń esiwi, suwdıń duzlılıǵınan paydalanıp jaqsı tájiriybeler islew múmkin. Balalıqtan oylap tabıwshılıqqa, alımlıqqa qızıǵıw, keleshekte jetik qánige ilimpazlardıń jetilisip shıǵıwına túrtki boladı. Sonlıqtan da bunday master-klaslardı jiyi-jiyi ótkerip turıw, balalardıń ilimge bolǵan qızıǵıwshılıǵın arttıradı,-deydi koordinator A.Ibragimova.

-Men búgin ápiwayı zatlardan paydalanıp, jańalıq jaratıw múmkinligin bilip aldım. Máselen, banan hám basqa suwlı miywelerden paydalanıp, olardı kompyuterge jalǵap, sım arqalı pionino shertiw múmkin ekenligi meni hayran qaldırdı. Men bunday islerdi tek ǵana ilimpazlar isleydi dep oylaytuǵın edim. Balalar da oylap tabıwshılıq penen shuǵıllanıwı múmkin ekenligin bilip aldım hám qızıǵıwshılıǵım arttı,-deydi konferenciya qatnasıwshısı Shaxsanem Ǵaniyeva

Haqıyqatında da bul konferenciya balalarda ayrıqsha tásir qaldırıp, qızıǵıwshılıqların arttırdı.

Klara XUDAYBERGENOVA

Respublikalıq Jaslar orayınıń «Jas jurnalistler» bólimi baslıǵı