-Meniń tariyx pánine qızıǵıwıma sebepshi bolǵan ustazım, klass basshım, tariyx páni oqıtıwshısı Orınbay aǵa Matyakupov,-dep gáp basladı qaharmanımız, paytaxtımızdaǵı 37-sanlı ulıwma bilim beriw mektebiniń 6-«orıs» klasınıń oqıwshısı Allayar Abdaliev.

-Ustazım, 5-klasımızdan bizlerge klass basshısı etip bekitilgennen baslap, onı hámmemiz jaqsı kóremiz. Oǵan qattı bawır basıp qalǵanbız. Ol da bizlerdi kútá jaqsı kóredi. Bárshemizdiń bárqulla alda hám aǵla oqıwshı, úlgili klass bolı­wımızdı qáleydi. Bizler menen islesiwden, jol-joba beriwden hasla sharshamaydı. Ol hár bir sabaǵın mazmunlı hám qı­zıqlı etip ótedi. Son­lıqtan barlıq waqıtta tariyx páninen iz­leniwge, puxta tayarlanıwǵa háreket etemen.

Tariyx pánine qızıǵatuǵın 5 oqıwshını saylap alıp, sabaq­tan bos waqıtları tariyx páninen tayarladı. Sonıń ishinde men de barman. Jaqında bolıp ótken «Bilim­liler bellesiwi»niń qalalıq basqıshına mektebi­mizdiń 6-klass oqıwshıları atınan meni alıp bardı. Men sonda al­bırayın dedim. Ishim­nen qayta-qayta «ustazımnıń isenimin aqla­ǵayman» dep tilek tiledim. Nátiyjede jarıs juwmaǵında 2-orındı alıwǵa eristim.

-Isenimdi aqladıń, Alla­yar,-dep meni ustazım qut­lıqladı. Kóp keshikpey us­tazım meni «Jetkinshek»ke alıp keldi. Meniń bul tabısıma hám quwanıshıma sherik bolǵan ustazıma aytar alǵısım sheksiz deydi,-qaharmanımız tolıp-tasıp.

-Oqıwshım Allayar menen maqtana alaman. Sebebi, maqtawǵa, maqtanısh etiwge arzıydı. Ózi kishipeyil, ádepli oqıwshı. Barlıq pánlerden de jaqsı, oqıydı. Tariyx páni menen inglis tili pánine qızıǵıwshılıǵı ayrıqsha, eki pánnen tayarlıqqa baradı. Bunnan tısqarı bos waqıtta sporttıń «qol urısı», «shax­mat» túrleri menen shuǵıl­lanadı. Shańaraqta ata-anası oǵan barlıq múmkinshiliklerdi jaratıp qoyıptı. Olar jiyi-jiyi qońıraw etip balasınıń oqıwı, tártibi jóninde sorap turadı. Onıń alǵa umtılısları háre­ketleri zaya ketpedi. Nátiy­jesin berdi. Aldaǵı waqıtları bárqulla birinshi bolıw-onıń maqseti,-deydi ustazı O.Matyakupov.

Biz de óz gezeginde bilimge qushtar, bárqulla alda hám aǵla Allayarǵa tabısları-tabıslarǵa ulasa bersin, deymiz.

D.ÚBBINIYAZOVA

arnawlı xabarshımız