Ádiwli oqıwshı, «Jetkinshek»tiń jankúyer jaqın dosları, ıqlasbentleri! «Qulaǵıńa gápim bar» klubımız bıraz waqıttan berli irkilińkirep qaldı. Bul ushın sizlerden keshirim soraymız. Klubımızdıń búgingi sanın ózińiz qatarlı doslarıńızdıń kewil keshirmelerin, birewge aytıwǵa batına almay júrgen sırların, ati­rapındaǵı bolıp atırǵan unamsız hádiyseler haqqında gazetamızǵa jollaǵan xatları tiykarında tayarladıq.

Balalar, klubımızda járiyalanǵan maqalalardı dıqqat penen jaqsılap oqıń.

 

«Jetkinshek»ti jetinshi klasqa deyin oqıy ma?

Ári oylanıp, beri oylanıp, usı maqalanı jazıwǵa májbúr boldım. Ótken jılı jazılıw ma­pazında ustazlarımız: -Balalar qanday gazeta-jurnallarǵa jazılasız?-dep soraw tasladı. Sonda men birinshi bolıp «Jetkinshek»ke jazılaman dedim. Klaslas doslarım duw kúlisti. Hayran qaldım. -«Jet­kinshek»ti jetinshi klasqa deyin oqıydı-ǵoy. Náp-náhán bolıp kirttay balalardıń gazetasın oqıysań ba?  Kim aytadı seni jo­qarǵı klastıń oqıwshısı dep?!…» Hár kim, hár jaqtan sóylep ketti. Oqıwshılardıń pi­kirin ustazımız da maqulladı.

Sol kúni men qattı qapa boldım. Úyge kewilsiz kirip keldim. Meniń jaǵdayımdı bilip ata-anam nege qapa ekenligimdi soradı. Klastaǵı búgingi waqıyanı aytıp berdim.

Sonda ata-anam: -Balam, hesh qapa bolma aytsa ayta bersin. Hesh qashan  «Jetkin­shek»ten qol úzbe. Ol saǵan haqıyqıy shın dos bola aladı. «Jetkinshek»tiń arqasında óziń kórip gúwası bolıp atırǵanıń joq pa, talantlı jaslar jetilisip shıǵıp atır. Seniń de tabıslarıń tabıs­larǵa ulasıp atır. Bizler soǵan quwa­namız,-dep biraz aqıl-násiyatın ayttı. Kóp keshikpey «Jetkinshek»ke bir jılǵa jazıldırıp berdi. Meniń quwanı­shımnıń shegi joq. Lekin, klas­laslarımnıń pikiri, maǵan kóz qarası basqasha.

Ádiwli zamanlaslar! Joqarǵı klass oqıwshılarınıń «Jetkin­shek»ti oqıǵanı ayıp pa?  Sizler ne deysiz? Pikirińizdi bilgim keledi.

Bahadır

Nókis rayonı

 

Tekseriw sizlerge qaldı ma?

Bizler rayonda jasaymız. Jaqında dostım menen birge Nókiske qıdırıp keldim. Kóp qabatlı jaylardıń qap­talınan júrip baratırıp dúkán, kafe, dárixanalardıń jazıw­larına itibar berdik. Qarasaq, ayırım­larındaǵı jazıwlar qáte jazılǵan. Hayran qal­dıq. Nege qáte jazıp qoyadı eken. Eger, ózleri bil­mese bile­tuǵın adam­larǵa kórsetip alsa boladı-ǵoy,-dep dostım ekewimiz izbe-iz atamalardı oqıp kete berdik. Qáte tapsaq «jerden jeti qoyan tap­qan­day» quwanamız. Bizlerdiń izimizde kiyatırǵan jası 60 larǵa barıp qalǵan aǵay, -Haw, qızlarım-ay ishińiz pis­ken eken. Qátesin tekseriw sizlerge qaldı ma? Sizlerge onıń ne awır-jeńili bar?! Ózleri biledi-ǵo, dedi de aldımızǵa túsip adımın tez-tez attı. Dostım ekewimiz oylanıp qaldıq.

Bul jazıwlardıń bizge awır-jeńili joq-aw, bıraq, hámme usılay biypárwalıqqa jol qoya berse, kórip turıp kórmeslikke ala bersek, aqıbeti ne boladı? Aqırı, «Tilge itibar-elge itibar» degen emes pe? Óz ana tilimizde durıs sóylep, durıs jazıw hár birimizdiń minnetli wazıypamız shıǵar. Ya bolmasa, bizlerdiń pikirimiz qáte me?

Aynura hám Baxıtgúl

Shımbay rayonı

 

Nege bizler jaman bolamız?

Qádirdanım «Jetkinshek»! Ishime sıymaǵan dártimdi, sizge «jazıw»ǵa qarar ettim. Ne qılayın shıdam degenniń de shegi boladı eken. Ata-anam ertede ajırasıp ketken. Ákem bizlerdi taslap, álle qashan basqa birewge úy­lenip ketti. Eki qızı bar. Al, bizler bir qız, bir ulmız. Anam­nıń tárbiya­sındamız. Anam bizlerdi qata­rı­mızdan kem etip qoyǵan joq. Ta­ma­ǵımız toq, ústimiz pútin. Átteń, bizler áke mehrine zarmız…

Bir kúni inim qońsımızdıń balası menen jánjellesip, tóbelesip qalıptı. Úyine jılap barǵan balasın ertip anası kelip, inimdi qalay bolsa, solay túygishlep urıp tasladı.

Sol kúni úkem kópke deyin solıǵın basa almadı. Aytıń, apa bizler jaman adam­larmız ba? Nege onda qoń­sımız «Sizler jaqsı bol­ǵanda ákeńiz taslap keterme edi?!»,-dedi-ǵoy, dep tep­sinip jıladı. Anam inimdi qushaqlap boz-boran boldı…

Men olarǵa ne dep táselle aytarımdı bilmedim. Bizlerdiń kimge ziyanımız bar?! Anam bárqulla adam­larǵa jaqsılıq etedi. Bizlerge de solay úyretken. Birew­diń iynedey nár­sesine tiymeń, ótirik sóylemeń, kishipeyil bolıń, jaqsı oqıń,-dep bárqulla aqıl-keńesin beredi. Nege bizler jaman bolamız?-degen sor­aw meni kópke deyin qıynap keldi. Ádiwli «Jetkin­shegim» saǵan ishim­degini tógip saldım.

Bizlerdi ákemiz oylayma eken? Ózim qatarlı dos­larımnıń ákesi haqqında tolıp-tasıp maqtanısh etkenlerin esitkenimde ish-ishimnen qattı ızalanaman. Ne qılayın iláj qansha?…

Dilnaz

Nókis qalası

 

Men de telefon bolmaǵanı ushın

Meniń shın dostım Juldız. Onıń menen bárqulla birge júremiz, birge sabaq tayarlaymız klastaǵı qızlardıń barlıǵında telefon bar. Tek bizler ekewimizde ǵana joq. Bir kúni dos­tımnıń tuwılǵan kúnine ákesi telefon sawǵa etipti. Erteńine klasqa alıp keldi. Quwanshınıń shegi joq. Hár tánepis sayın telefonın shuqlaw menen boldı. Meniń de oǵan háwe­sim keldi. Qımbat bahalı telefon edi. Juldız telefonıńdı bir kórip bereyin dep qıyıldım. Ol birden: -Yaq, bol­maydı,-dedi dawısın kóterip. Men bir túrli bolıp kettim. Aqırǵı sabaq tamam bolaman degenshe ol maǵan bir awız sóz de aytpadı.

Sabaq tamam bolıwdan mennen burın klastan shıǵıp ketip qaldı. Mennen bes-altı adım aldı da qımbat bahalı telefon kóteretuǵın qızlardıń qatarına qosılıp kúlisip barar edi. Juldız artına bir qarap qoydı da, janındaǵı qızlarǵa men haqqında bir nárselerdi aytıp atırǵanday túyildi. Hámmesi birden duw kúlisti. Qattı izam keldi… Shın dos degen de sonday bola ma eken?!

Ádiwli doslar! Dostım Juldızdıń usı háreketi durıs pa? Men ne isleyin, maǵan keńes beriń!

Sabina

Taqıyatas qalası