Qádirli balalar! Súyikli «Jet­kin­shek» gazetańızdıń eń belsendi xa­barshılarınıń biri qońıratlı Quwanısh­bay Qutlımuratov atańız boladı. Ol bul gazetaǵa eliw jıldan berli óziniń ájayıp qosıq hám ma­qalaları menen elege shekem qatnasıp kelmekte. Tınıp-tınshı­maytuǵın atańız bıyıl 80 jastı qarsı almaqta. Usı jasqa kelse de ele ol balalardıń ruwxıy azıǵına azıq qosıp, ádep-ikramlılıqqa hám jaqsılıqqa baslawshı qosıqları hám gúrrińleri menen quwanısh baǵısh­lap turadı. Hár jılı gazetaǵa jazılıp, onıń menen sırlas boladı. Ol kóp jıllar dawamında jas áwladlarǵa qaraqal­paq tili hám ádebiyatı páninen sabaq berip, oqıwshılarǵa ustazlıq etti. Házirgi waqıtta Q.Qutlımuratov nuranıy ustaz, miynet veteranı. Jaqında onıń «Bilim» baspasınan shıqqan «Áwmetli qarmaq» ata­ma­sındaǵı kitabı jarıq kórdi. Tiykarınan kitapta baxıtlı balalıq, úlkenlerge húrmet, kishi­lerge izzet hám tár­biyalıq áh­miyetke iye bir-birinen qızıǵarlı gúrrińler orın alǵan. Biz onıń kitap­taǵı ayırım qosıqların ná­zerińizge usınıwdı maqul kórdik.

Redakciya

 

Náller ektim baǵıma

Járdem berip atama,

Baǵmanlıqtı tańladım.

Náller ektim baǵıma,

Eń dáslepki talabım.

 

Hár kúni suw quyaman,

Náller tutıp ketsin dep.

Tógin berip awdardım,

Tez jetilip óssin dep.

 

Bórtikledi tez kúnde,

Kógis dóndi erigim.

Sezip júrmen ózim de,

Quwanıshlı hár kúnim.

 

Úsh ay ótti aradan,

Báhár keldi jańadan.

Appaq bolıp gúllepti,

Qarap tursam aynadan.

 

Miynetimniń jemisin,

Kórip júdá shad boldım.

Qutlıqladı atam da,

Oń bolsın,-dep talabıń.

 

Búlbil bolıp sayraydı

Xosh keldiń, úlkeme Nawrız bayramı,

Xalqımnıń saǵınıp kútken áyyamı.

Dúnyanı quwanısh, shadlıqqa bólep,

Dógerek-dash álwan gúldey jaynadı.

 

Kókte quyash altın nurın sewip tur,

Ana jer bawırın narday iyip tur,

Jipek samal bórtiklerdi oyatıp,

Kewillerge jıllı lebin quyıp tur.

 

Miywa daraqları bórtik bayladı,

Kók jasıl dala gúldey jaynadı.

Kózdi qamastırıp Nawrız áyyamı,

Tańda serxosh búlbil sayraydı.

Quwanıshbay Qutlımuratov

Qońırat rayonı