Mektebimizde óz kásibine pidayı, bar bilimin jalıqpastan oqıwshılarǵa úyretetuǵın, jas tájiriybeli muǵallimler júdá kóp. Olardıń biri inglis tili páni oqıtıwshısı Maryam Ismaylova oqıwshılardı Respublikalıq tańlawlarǵa tayarlaw jumısların júdá nátiyjeli alıp barmaqta.

Buǵan ayqın mısal etip, usı jıldıń 26-27-mart kúnleri rayonı­mızda jaylasqan ulıwma bilim beriw mektepleri arasında ótkerilgen «Bilimliler bellesiwi»nde M.Ismaylovanıń eki oqıwshısı jeńimpaz bolıp, mektebimiz já­máátin úlken quwa­nıshqa bóledi. Maryam oqıtıp atırǵan 5-klass oqıwshısı Taxmina Mu­xiyatdinova 97 ball, 6-klass oqıwshısı Jasulan Dóngesov 92 ball top­lap, bilim bergen ustazınıń júzin jarıq etip, rayonlıq basqısh jeńimpazları sıpatında rayonlıq Xalıq bilimlendiriw bólimi tárepinen «Diplom» hám estelik sawǵaları menen sıylıqlandı.

«Ustazı jaqsınıń us­tamı jaqsı» dege­nindey, tájiriybeli ustazdıń bul qos tabısı mektebimiz oqıwshılarınıń inglis tilin úyreniwge degen qızı­ǵıwshılıǵın jáne de art­tıradı. Al, olarǵa bar ıqlası menen bilim be­retuǵın muǵallimler jámááti ushın kásip­lesiniń bul jetiskenligi jańadan-jańa kúsh-ǵayrat hám maqtanısh sezimin inam etedi.

Gúlayım ÚSENOVA

Nókis rayonındaǵı 22-sanlı ulıwma bilim beriw mektebiniń inglis tili muǵallimi