Mektepte oqıp júrgenimde «Jet­kinshek» gazetasınıń hár bir sanın qaldırmay oqıytuǵın edim. Men de  dóretiwshilikke qızıǵatuǵın edim, lekin negedur maqala jazıp, gazetaǵa dóretpelerim menen qatnasıwdı oylamappan. Sol waqıtları mekte­bi­mizdiń oqıwshısı «Jetkinshek»tiń bel­sendi xabarshısı Sevara Sidabul­la­evanıń dóretpeleri gazetadan turaqlı túrde shıǵıp turatuǵın edi. Bizler oǵan tek ǵana háwes etip, onnan jol-joba sorawǵa tartınatuǵın edik. Biraq, son­da meniń de kishkene kewlimde «qá­nekey meniń de maqalam «Jetkin­shek»te shıǵıp, dóretpelerimdi balalar oqısa eken»-degen niyetlerim boldı. Sonda balalıǵımız ba, gazetadan shı­ǵıwdı qol jetpes arzıwday sezetuǵın edik. Degen menen, bul niyet­lerimniń bir kún kelip iske asatuǵınlıǵına isenetuǵın edim.

Shınında da, maqa­lam súyikli gazetamda jarıq kórdi. Liceydiń ekinshi basqıshında oqıp júrgenimde eń birinshi dóretpem yaǵnıy «Bul jer ele zor boladı» atlı maqalam shıqqanda úyge qaray «qustay ushtım». Quwanıshımnıń shegi joq. Ásirese mennen de kóp quwanǵan ata-anam boldı. Men dáslepki dóretiwshilik sabaqlardı «Jetkinshek»ten aldım. Meniń qá­demim sátli boldı. Bazı da átirapım­daǵılar; «Sen balalar ga­zetasına ma­qala jazıw jasınan óttiń-ǵoy, onnansha basqa gazetalarǵa nege jazbaysań?»-dep pikir aytqanlar da boldı. Lekin, «Jetkinshek» gazetası meniń dóre­tiwshiliktegi birinshi ustazım boladı. Sonlıqtan, men hesh qashan gazeta­dan qol úzbeymen, onnan ruwxıy azıq alıwdan toq­tamayman. Sebebi, ol hárdayım jas jetkinsheklerdi jetiklikke, jetiskenlikke qaray baǵdarlamaqta.

Muxtar Úmbetov

Ózbekstan Respublikası Ishki Isler ministrliginiń Qaraqalpaq akade­miyalıq liceyiniń oqıwshısı