Kempir apamnıń tisi

Kempir apam bıyıl jetpis jasta. Jaqında ol jasalma tis saldırdı. Tisin jatarda alıp, kesaǵa salıp qoyadı.

Keshe bir qızıq waqıya boldı. Azanda uyqı­dan tursaq, kem­pir apamnıń kesadaǵı tisi joq. Izlep hesh jerden taba alma­dıq. Bir gezde úyimizdegi bir jerinde aǵı joq qap-qara pı­shıǵımızdıń bir nárseni súyrep baratırǵanın kórdik. Qarasaq, kempir apamnıń tisi. Kempir apam túnde bizler menen tawıqtıń góshin jep edi. Tisinde sonıń iyisi qalǵan eken. Pıshıq sonı jalap júr eken.

Ayzada ÁWEZOVA

Qaraózek rayonı

 

«Ańqaw keskir»ge xatlar

Húrmetli «Ańqaw keskir»!

Meniń Quwandıq degen tórt jasar úkem bar. Úkem úyde eń kishkene bolǵanlıqtan erketay bala. Ol mazalı zatlardı júdá jaqsı kóredi, dasturxanda qaǵazlı shokolad tursa bárin bir zamatta jep qoyadı. Al, jasırıp qoysaq báribir tawıp aladı da, qaldırmastan jep qoyadı. Qansha aytsaq ta, hesh tıńlamaydı. Bir kúni tisi qattı awırǵanda, endi shokolad jemeymen dep edi. Biraq, tisi táwir bolǵannan keyin jáne ádetin qoyǵan joq.

«Ańqaw keskir», bizler endi úkemiz shokolad jemewi ushın ne qılayıq?

*   *   *   *   *

Ótken jılı kegeylishi dostımız Nursulıw Kokanova «Yosh kitobxon» tańlawında 1-orındı alıp, «Spark» mashinasına iye boldı. Ol jurnalistlerge bergen intervyusında «600 kitap oqıdım» dep ayttı. Al, meniń bir dostım bolsa, 600 kitap oqıwı múmkin emes, sonda ol basqa hesh nárse islemesten, tek kitap oqıy bere me eken?-deydi. Sizler buǵan ne deysiz? Juwabıńızdı kútemen.

Gúlbanu ABATBAEVA

Nokis medicina kolledjiniń 2-basqısh oqıwshısı

 

Húrmetli «Ańqaw keskir»!

Siz qar qorıqshıları haqqında esitkensiz be? Esitpeseńiz ol biziń úyde bar. Ol meniń 5 jasar sińlim Aysulıw. Onı nege búytip atawımızdıń sebebin sizge aytıp bereyin.

Sińlim Aysulıw qardı júdá jaqsı kóredi. Biraq, qar menen oynamaydı. Tek onıń jawıwın baqlaydı. Qar jawıp bolǵannan soń, onı qorıydı. Esikten kim kirip shıqsa da, onıń aytatuǵın gápi: «Qardı baspań, appaq qardı búldirmeń. Burın basılǵan izlerden basıń»-dep totıqustay qaytalaǵanı qaytalaǵan.

Sińlimniń bul qılıǵınan soń, eń birinshi apam, keyin hámmemiz Aysulıwdı «Qar qorıqshısı» dep shaqıratuǵın boldıq. Biraq, qar báribir erip ketedi. Sol waqıtta sińlimdi jubatıw qıyın. Aysulıw qar jawǵanda qáytip quwansa, qar erigende sóytip qapa boladı.

«Ańqaw keskir, Aysulıw sińlime járdem beriń, oǵan qardıń eriwi tábiyiy hal ekenin túsindire berip, biz sharshadıq. Bálkim siziń aytqanıńız tásir etip qalar?!

Sálem menen, Xafiza.

 

-Húrmetli Xafiza hám Gúlbanu! Sizlerdiń bul sorawıńızǵa gazeta oqıwshılarınan  juwap kútsek, olar ne der eken? Bálkim, qızıq hám tásirli pikirler aytar.

«Ańqaw keskir»

 

Keliń, birge kúliseyik!

MUǴALLIMIMIZ…

-Maqset, klasıńda eń jalqaw kim?

-Bilmeymen.

-Hámme jazıp atırǵanda kim jazbay otıradı?

-Muǵallimimiz.

 

BAǴDA HESH KIM BOLMASA

Oqıtıwshı oqıwshı­larǵa jıl máwsim­leri haq­qında tú­sinik berip atır:

-Qıs suwıq. Báhár-átiraptıń bári gúlge oranǵan. Gúz bolsa miywe hám palız ónimlerine bay.

Qáne, Maqset aytshı, alma jew ushın qashan jaqsı payıt esaplanadı?

-Men baǵda heshkim bolmasa ház etip alma jeymen.

 

BANKIGE-AQ SĺYDĺ

Murat Maratqa maqtandı:

-Keshe aǵam ekewimiz kólden kóp balıq tuttıq.

-Náhán qapqa da sıymay qalǵan shıǵar?

-Yaq-aw, kishi bankige -aq sıydı.

 

…KÓBEYTIP ATĺRMAN

Shókkish penen oyınshıqların sındırıp otırǵan úsh jasar Asqarǵa anası keyidi:

-Balam, ne qılıp atırsań?

-Oyınshıqlarımdı kóbeytip atırman.

Japaq SHAMURATOV

Qońırat rayonı

 

Poeziya múyeshi

JUWĺRĺWDĺŃ PAYDASĺ

Bir kúni tań sáhárden,

Juwırıwǵa óttim men:

-Ajıratpas ǵarrı-jastı,

Juwırıwdıń kóp paydası.

Qalmaydı hesh awırıw jeriń,

Qıysıq gewdeń dúzeledi,

Uzaq bolar omir jasıń,-

Desem, dedi maǵan Qasım:

-Juwırsa da qısı jaz,

Qoyan nege jasar az?

Jatsadaǵı tas qatıp,

Júzge kirer tasbaqa.

-Ex, sen jas tábiyatshı,

Sózińdi oylap aytshı.

Shapsa da tınbay qoyan,

Janın oylaydı mudam.

Qaltırap, shorshıp jasar,

Hár nárseden qorqıp jasar.

Qulaǵınıń uzınlıǵı,

Esitiwdiń qolay jolı.

Túnde de tınım bilmes,

Bir jerde qonım bilmes.

Úzliksiz dirilder,

Qorqıw onı óltirer.

Tasbaqada tas qalqan,

Jawdan saqlar hár qashan.

Hawlıqpaydı, saspaydı.

Tas kóterip shınıǵar,

Sap hawada tınıǵar.

Qıymıldap, ol qır asar,

Sol sebeplı júz jasar.

 

QĺZĺMNĺŃ QOSĺǴĺ

Meniń bópe sińlim bar,

Shashı-sarı, kózi-kók.

Bárha tıp-tınısh jatar,

Juwas emes, dım tentek.

Atın qoydım Gúlayım,

Qarasları múlayım.

Awqat bersem jemeydi,

Shaqırsam da kelmeydi.

«Áwp-áwp» etsem «ińgá» dep,

Kúlmes biraq, salsam ser.

Kúni boyı oynayman,

Oyınǵa hesh toymayman.

Kótersem tolar qushaǵım,

Bul-meniń quwırshaǵım.

Japaq SHAMURATOV

Qońırat rayonı