Paytaxtımızdaǵı I.Yusupov atındaǵı qánigelestirilgen mámleketlik mektep-internatında oqıwshılar arasınan jetilisip shıǵıp kiyatırǵan jas shayırlardı tabıw, olardıń dóretiwshilikke bolǵan qızıǵıwshılıǵın arttırıw, erkin pikirlewge, kóbirek kitap oqıwǵa iytermelew, ruwxıy jaqtan xoshametlew maqsetinde hár sherektiń juwmaǵında «Ayaziy izbasarları» tańlawın shólkemlestiriw dástúrge aylanǵan.

Jaqında usı tańlawdıń úshinshi sherek basqıshı ótkerilip, oǵan mektep-inter­natınıń 50den aslam intalı oqıwshıları óz dó­ret­peleri menen qatnastı. Tańlaw eki shártten ibarat bolıp, dáslep oqıwshılar ózleri jazǵan qosıqların kórkemlep oqıp berdi. Sonday-aq, tóre­shiler tárepinen olardıń qosıq­larınıń mazmunı, originallıǵı hám qosıq qurılısı bahalap barıldı.

Ekinshi shártte tańlaw qat­nasıwshıları Qaraqalpaq áde­biyatınıń bayteregi, dóretiw­shilikte Ayaziy atı menen qálem terbetken Ibrayım Yusupovtıń dóretpelerin yad­tan kórkemlep oqıw boyınsha óz-ara bellesti.

-«Ayaziy izbasarları» tań­lawınıń mek­tebimiz kóleminde turaqlı ótkerilip baslanǵanına jańa ǵana 1 jıldan aslam waqıt bolsa da, ol oqıwshılarımız arasında dóretiwshilikke úlken qızıǵıwshılıq oyata aldı. Bul tańlaw oqıwshılarımızdı kitap penen dos bolıwǵa, qaǵaz qaralap dó­retpeler jazıwǵa, respublikamızda shı­ǵatuǵın gazeta-jurnallarǵa óz dó­retpeleri menen belsene qatnasıwǵa, eń áh­miyetlisi, Ibrayım atasınday shayır bolıwǵa baǵdarlap kiyatır,-deydi tańlaw shól­kemlestiriwshisi, mek­teptiń qánigelik pánleri boyınsha direktor orınbasarı Z.Satbaeva.

Haqıyqatında da, tańlaw dawamında qatnasıwshılardıń dóretpelerin baqlay otırıp, olardıń qálemleri ádewir ısılıp atırǵanınıń gúwası boldıq. Olardıń arasınan jeńimpaz dep tabılǵan 5-klass oqıwshıları A.Jaqsımuratova, K.Aytjanova, 6-klass oqıwshısı Q.Dáw­letyarova, joqarı klass oqıwshıları  G.Erejepova hám A.Jabbar­bergenova­larǵa mektep-internatı táre­pinen «Húrmet jarlıq»ları hám sawǵalar tapsırılıp, oqıw jılı juwmaǵında ótkeriletuǵın final basqıshına jollama berildi.

B.Sultamuratov

arnawlı xabarshımız