Húrmetli Prezidentimiz tárepinen Moynaq rayonına qaratılıp atırǵan úlken itibar onda tuwılıp ósken hár bir insannıń kewlinde keleshekke bolǵan isenimin arttırıp, jańadan kúsh-ǵayrat baǵıshlap atırǵanday. Ásirese, mámleketimiz basshısınıń respublikamızǵa bolǵan xızmet saparlarınıń derlik hár birinde usı rayonǵa barıp, ol jerdegi ápiwayı xalıq penen ushırasıp, ziyrek, bilimli hám qábiletli jaslar menen sáwbetlesiwi, moynaqlı jaslarǵa ózgeshe ruwx inam etip, tuwılǵan jeriniń gúllenip-rawajlanıwı ushın óz úleslerin qosıwǵa baǵdarlaydı.

Usınday jaslardıń biri Qaraqalpaq mámleketlik universitetiniń Dene-mádeniyatı fakultetiniń 3-kurs studenti Sapura Qayıpnazarova óziniń sport hám dóretiwshilik tara­wındaǵı jetiskenlikleri arqa­sında 8-mart—Hayal-qızlar bayramı qarsańında Zulfiya atındaǵı mámleketlik sıylıq iyesi atanıp, tek Moynaqtıń emes, al pútkil Qaraqalpaqstannıń maqtanıshına aylandı.

1996-jılı 12-iyul kúni Aw­ǵanstan urısı veteranı Jalǵasbay Matxanov (marhum) hám Biybisánem Sadullaevalardıń shańaraǵında tórt uldan keyin tuwılǵan Sapura kishkene waqtınan aǵalarınıń izine erip, ul balalarday bolıp ósti. Moynaq rayonındaǵı «Tikózek» awıl puqaralar jıyınında jaylasqan 7-sanlı ulıwma bilim beriw mektebiniń 6-klasında oqıp júrgen bir kúnleri Sapura rayondaǵı boks dógeregine qatnaytuǵın ájaǵası Dástannıń úydegi boks meshoginde shu­ǵıllanıp atırǵanın kórip, bul sportqa ıqlası oyandı. Qarın­dasınıń qızıǵıwshılıǵın sezgen ájaǵası oǵan boks qolǵabın kiygizip, Sapuraǵa boks sırların úyrete basladı. Degen menen, jalǵız qızınıń sport penen shu­ǵıllanıwın qálemegen Biybi­sánem apa oǵan ájaǵaları menen sport dógeregine qatnawına ruqsat bermedi.

Sapuranıń sportqa bolǵan shın ıqlası onı tolıq tárk etpedi. Mektepti juwmaqlap, ata-anasına keleshekte ishki isler uyımında islewdi niyet etkenligin aytıp, paytaxttaǵı QMU janın­daǵı 1-sanlı Akademiyalıq liceydiń social-gumanitar pánler baǵdarında oqıw ushın jol aldı. Liceyde oqıp júrip ol jerdegi trener E.Suyupovtıń qol urısı sport dógeregine jazıldı. Bul ret anası qızınıń rayın qaytarmadı, oǵan razılıq bildirdi.

Sapuradaǵı qol urısı sport túrine bolǵan shın ıqlas tre­neriniń dıqqatın tarttı. Sonlıqtan ba, bir ay óter-ótpesten Qara­qal­paqstan Chempionatına jolladı. Sapuranıń qarsılası bes jıldan berli qol urısı sport dó­geregine qatnap atırǵan, tá­jiriybeli sport­shı qız boldı. Biraq, ol ekilenip, artqa sheginbedi. Qaytama, bar qábiletin hám ónerin iske salıp, qarsılasın jeńip shıqtı. Qızınıń birinshi tabısı haqqında esitken ata-anası júdá quwandı. Bunnan ruwxlanǵan Sapura qol urısı sport túri menen shıntlap shu­ǵıllana basladı. Trenerleri J.Pir­nazarov, J.Seytaev hám Q.Sabu­rovlardıń qollap-quwatlawında qol urısı boyınsha Qaraqal­paq­standa 15 márte, Ózbekstanda 7 márte, Aziyada 1 márte chem­pion boldı. Usı jetis­kenlikleriniń arqasında 2016-jılı Qaraqalpaq mám­leketlik uni­versitetine oqıwǵa kirip, házirgi waqıtta ustaz­la­rınan teoriyalıq bilimlerdi almaqta.

Biz Sapuradan: -Sporttan basqa jáne nelerge qızıǵasız?-dep soraǵanımızda, ol: -Sport­tan bos waqıtlarımda jámiyetlik islerde de belsendi bolıwǵa tırısaman. Ózbekstan Respub­likası Xalıq demokratiyalıq par­tiyası tárepinen ótkerilgen «Jas siyasatshı» tańlawınıń Qaraqal­paqstan Respublikası basqı­shında jeńimpaz boldım. Sonday-aq, dóretiwshilik etiwdi jaqsı kóremen. Moy­naqlı bel­sendi hayal Kúnsulıw Nasırova dóre­tiwshiliktegi ustazım esap­lanadı. 2017-jılı «Qaraqal­paq­stan» baspasınan «Úlkeme ke­liń» dep atalǵan qosıqlar top­lamım shıqtı,-dedi tolqınlanıp.

Sapuranıń kóksine jarasıp turǵan Zulfiya atındaǵı mám­leketlik sıylıqtıń kókirek nısha­nına erksiz kózimiz túsip, onı Prezi­dentimizdiń jeke ózinen qabıl etip alǵan waqtındaǵı quwanıshların aytıp beriwdi soradıq.

-Rasın aytsam, sonday quwa­nıshlı máwritte kózime qalayınsha jas kelgenine ele hayran qala­man. Bálkim, bul quwanısh jas­ları bolsa kerek?! Men eń áwele Jurtbasshımızǵa biz qaraqalpaq jaslarına bildirip atırǵan isenimi ushın raxmet aytaman hám bul sıylıqqa bár­qulla múnásip bolıw­ǵa, elimniń jáne de rawajlanıwı, gúllep-jasnawı ushın perzentlik kúsh-jigerimdi ayamay, xızmet etiwge sóz beremen!

Qaraqalpaq hayal-qızlarına tán ashıq minez, iybe artına jasırınǵan qaysarlıq hám dáw­júreklik qásiyetlerin Sapura Qayıpnazarova kelbetinde kóre aldıq. Alıs Moynaqtan óziniń tınımsız miyneti hám izlenisleri arqasında «júzden júyrik» bolıp shıǵa alǵan ol búgin mám­leketimiz tárepinen dáslepki xoshametin aldı. Sebebi, Zulfiya qızları qatarınan orın alǵan Sapura keleshekte bunnan da úlken tabıslardı qolǵa kirgiziwdi rejelestirip otır.

B.Sultamuratov

arnawlı xabarshımız