Keshe ǵana qolına qálem alıp, kishkene kewlindegi keshirmelerin aq qaǵaz betine túsirip, dóretiwshilik dúnyasına kirip kelgen qızalaq búgingi úlken sıylıq iyesine aylanıwın kim oylaptı deysiz?! Álbette, jas qálemkeshlerdi qollap-quwatlap, olarǵa ruwxıy mádet, dóretiwshilik kúsh-quwat berip, jetiklikke jetelep kiyatırǵan balalardıń súyikli gazetasınıń bul birinshi yaki sońǵı qaharmanı emes. Bul qutlı dárgaydan qanat qomlap, dóretiwshilik dúnyasındaǵı tabısları menen Zulfiya atındaǵı mámleketlik sıylıqtıń laureatı bolǵan beruniyli belsendi xabarshımız, Tashkent mámleketlik agrar universiteti Nókis filialı janındaǵı Tórtkúl akademiyalıq liceyiniń 3-basqısh oqıwshısı Sarbinaz Tulieva «Jetkinshek»ten jetilgen baxıtlı qız.

Búgin oǵan bárshe háwes penen qaramaqta. Ásirese, dóretiwshilik ále­mine ıqlas qoyǵan, óz talantına degen isenimi artqan júzlep ıqlas­bent­lerimizdiń kewillerinde úmit ushqınları uyalaǵan bolsa ájep emes…

Shınında da, Sarbinaz redakciyamızǵa anası Shiyrin Sultanova hám kishkene úkeleri Xasan, Xusanlar menen kelgende Beruniy rayonındaǵı 54-sanlı ulıwma bilim beriw mektebiniń 6-klasında oqıytuǵın edi. Onıń sonda redakciya esiginen tar­tına-tartına kirip, us­tazlarınan kóp márte esitken, sonday-aq, elimizge belgili úlken jazıwshı-shayırlar jetilisip shıqqan teberik dárgayǵa tuńǵısh márte qádem atqanına hesh kózleri isenbegen edi. Sol payıtları sportshı, akrobatik egizek úkeleri Xasan hám Xusan­lardıń súwretleri menen shıqqan «Jetkinshek»ti qolı­nan tas­lamay, doslarına maqtanǵanları ele yadında. Bálkim, sol úkeleriniń re­dak­ciyamızǵa qádemi, olar haq­qındaǵı jarıq kórgen maqala jas qálem­keshtiń talantın oyatqan shıǵar?!

Haqıyqatında da, redak­ciyamızǵa úkeleriniń tabıs­larınan tolqınlanıp kelgen Sarbinazdıń kishkene kew­linde dóretiwshilkke ıqlas oyanǵanı anıq. Ol gaze­tadaǵı teńles­leriniń hár bir dó­retpesin oqıp, tásirlenetuǵın edi. Olardı oqıw arqalı pi­kirleri tereńlesip, keyin ala kishkene tórtliklerdi dórete basladı. Eń birinshi qosıǵı 6-klasta «Tı­nıshlıq» degen at penen «Jet­kinshek»te jarıq kórdi.

Bul kún onıń ómirinde óz miynetin hám qábiletin kórsete alǵan birinshi tabısı bolıp, máńgi yadında qaldı. Kishkeneliginde onıń ilham keltiriwshi qosıq dápteri bar edi. Sol dápterdi jańa tuwılǵan qosıqları menen toltırıp, Beru­niyden redakciyaǵa qustay ushıp keletuǵın edi. Qosıqlarınıń gaze­tada jarıq kóriwi jas qálemkeshti yoshlan­dırıp, jáne de tınımsız izleniwine jol saldı. Jas dóretiw­shilerdiń qábiletlerin arttırıp kiyatırǵan  «Jetkinshek» Sarbinaz­dıń us­tazı, dostı, sırlası hám kele­shekke jetelewshi ǵamxor­shısına aylandı. Tınıp-tınshımas qahar­manımız kishkeneliginen-aq redak­ciyamız tárepinen ótkerilgen hár bir tańlawǵa dóretpeleri menen belsene qatnasıp, joqarı orınlardı alıp kiyatır. Sonday-aq, ol 2018-jılı Ámiwdárya jurnalı táre­pinen ótkerilgen tańlawda balalar ádebiyatı jónelisinde «Eń jaqsı qosıq avtorı» nominaciyasınıń jeńimpazı boldı. Onıń biyǵubar balalıq sezimleri «Xurriyat», «Haqi­qat qızıman», «Tong shulasi» ata­masındaǵı qosıqlar toplamlarında orın aldı.

Talant bolmasa, tabıslar óz-ózinen esik qaǵıp kelmeydi. Qızın­daǵı talant ushqının óz waqtında júzege shıǵarıp, qollap-quwatlap, redakciya tárepinen ótkerilgen hár bir keshe, jarıslarǵa erinbey Beru­niyden-Nókiske qatnaǵan anası Shiyrin apanıń da úlesi bar, álbette. Ata-ana ushın bunnan úlken baxıt bolmasa kerek?! Óz perzentiń saǵan alǵıs keltirse, miynetiniń jemisin kórseń, sonıń ózi úlken jetiskenlik. Talapshań ana hám umtılıwshań perzenttiń pazıyletleri, miynetleri bárshege órnek bola­tuǵınlıǵı haqıyqat.

-Sarbinaz seniń atıńdı bunnan keyin de esitiw nesiyp etsin!-degen Prezidentimizdiń sózleri meni jáne de ruwxlandırdı hám óz dóre­tiwshiligimdi bayıtıwımdı niyet ettim,-deydi Sarbinaz.

Xalqımızdıń itibarına, húr­metine ılayıq bolǵan Zulfiya qızları erteńgi kún nurlı keleshek jollarına gúller egip, baǵlar jaratatuǵınliǵı anıq. Solar qatarında qaharmanımız da. Bunday mártebege erisken qızlar keleshekte álbette, alım, aka­demik, qaharman bolıwdı kewil­lerine túyedi…Júregine usınday ullı niyetlerge jol ashqan Sarbinazdan da úmitlerimiz kóp. Aldaǵı waqıtta Tashkenttegi Shıǵıstanıw univer­sitetiniń jurnalistika fakultetinde oqıwdı niyet etken qaharmanımız haqıyqıy Zulfiya izbasarı bolıp, elimizdiń maqta­nıshlı qızı bola­tuǵınlıǵına isenemiz.

Zuxra Isakova

arnawlı xabarshımız