Kishkene Ilahiydaǵa anası bazardan sup-sulıw tufliy satıp ákelip berdi. Ilahiydanıń quwanıshınıń shegi joq. Tufliyin sheshpesten, qayta-qayta ayaǵına qaraw menen kúnin ótkerdi. Awqat-shay iship te tınıshı bol­madı. Tezirek doslarına kór­setip, maqtanǵısı keldi. Sol payıtta olardıń úyine qońsısı Sara apa keldi. Onıń al­dına juwırıp shıqqan Ilahiyda dárhal ayaǵındaǵı tufliydi kórsetip; «Apam áperdi»,-dedi mardıyıp.

-Oy-buw, dım jaqsı eken, maǵan bereseń be, qızıma aparıp bereyin,-dedi Sara apa.

-Yaq, bermeymen,-dedi Ilahiyda awzın shúrtiytip. Soń oynap ketip qaldı. Apası menen Sara apa ángimesin dawam etti. Kóp ótpey Ilahiyda sırttan keldi de:

-Mına qarań, apam bazardan ákelip berdi,-dedi jáne maqtanıp.

-Tufliyiń zor eken, men de qızıma alıp bereyin,-dedi Sara apa marapatın berip. Apası qısınıp:

-Uyat boladı, bar ájapańa kórset,-dedi. Ol juwırıp bólmeden shıǵıp ketti. Birazdan Ilahiyda ból­mege kirip keldi. Ayaǵına qarap, endi sóyleyjaq edi, Sara apa:

-Apań saǵan bazardan sawǵa alıp berdi-ya. Tufliyińe júdá háwesim kelip tur. Meniń qı­zıma bermey-aq qoy, óziń kiy yaqshı ma?!-dedi onıń jáne maqtanajaǵın túsinip. Soń dárriw qaytıwǵa asıqtı. «Jáne birde kelermen, aman otırıń»,-dedi. Apası bolsa onıń ketkenine qısınıp, «Qızım basıńdı qatırdı-aw»-dedi. Bir tárepinen Ilahiydanıń qılıǵına da kúlgisi keldi. Állenemirden soń sawǵa iyesi yadına túsip, úyindegiler onı izley basladı. Qarasa, Ilahiyda ayaǵındaǵı tufliyin sheshpesten, tórgi bólmede uyqılap qalıptı.

Sarbinaz Tureshova

QMU niń magistrantı