Sárbinaz sińlisi ekewi qatar ósken­likten be tez-tez jánjellesetuǵın edi. Jánjeliniń sebebi, áytewir nárse, «sen bunı is­lemediń, men kóp jumıs isledim» degen báneler. Anası sonda olarǵa kúyip-pisip baqıratuǵın edi. Ba­lalıǵı basım ba, anasınıń bergen aqılı bir qulaǵınan kirip, ekinshi qulaǵınan shıǵıp ketetuǵın edi. Sonday kúnlerdiń birinde apalı-sińli 8-mart bayramına anasına zor sawǵa berip, quwandırmaqshı boldı. Sárbinazdıń toqımashılıq ónerine uqıbı bolǵanlıqtan, anasına shulıq toqıwdı, al sińlisi Aynur súwretshilikke qızıǵıwshılıǵı sebepli ájayıp gúldiń súwretin salmaqshı boldı. Solay etip, jaqın qalǵan bayramǵa olar qızǵın tayarlıqtı baslap jiberdi.

Hádemey bayram da jetip keldi. Tań azannan turıp, Sárbinaz benen Aynur negedur arzımaǵan nárseniń ústinde tartısıp qaldı. Aynur sonda: -Seniń saw­ǵań báribir apama unamaydı. Shulıǵıńdı toqıp bolaman degenshe kún de ısıp ketedi. Meniń sawǵam senikinen zor. Kóreseń apam menikin maqtaydı,-dep ájapasınıń jinine tiydi. Sińlisiniń gápleri qulaǵınan keter emes. «Rasında da, apama Aynur­dıń sawǵası unasa she?»-degen pikir Sárbinazdıń qıyalınan ótti.  Ol sumlıq oy­lay basladı. Aynurdıń úlken appaq qaǵazǵa sulıwlap salǵan gúlin áste jasırıp aldı da, súwretti ruchka menen shıjbaylap tasladı. Bir waqıtta daladan kelgen sińlisi bunı bayqap qaldı da, dárhal súwretine asıldı. Sawǵasınıń awhalın kórip, ókirip jılap jiberdi. «Endi men apama ne sawǵa beremen, seni endi ájapa demeymen»,-dep kóziniń jası sorǵalap, qolına ne tússe Sárbinazǵa zıńǵıta basladı. Ele de úyinde anası joq edi. Azanda erte qayaq­qadur ketken. Sárbinaz dalaǵa qashıp qutıldı.

Túste bazardan kelgen anasınıń aldına ekewi juwırısıp shıqtı. «Bayramıńız benen, apa!» dedi jabırlasıp.

-Way, meniń aqıllı qızlarımnan aynanayın, sizlerdiń de bayramıńız qutlı bolsın,-dedi anası kózleri quwanıshtan kúlimlep. Sárbinaz dárhal bólmesine juwırıp ketti. Anasına sawǵasın ber­mekshi. Ol shkafka jasırıp qoyǵan toqıǵan shulıǵın aldı da, kózleri uyasınan shıǵıp kete jazladı. Ne kóz benen kórsin, shulıq qıyqım-qıyqım bolıp, qayshı menen qıyıp taslanǵan. Bul sıńlisiniń isi ekenligin bildi de, bólmesinen atlıǵıp shıqtı. Qansha kóziniń qarashıǵınday etip jasırıp qoyǵanı menen sińlisi shaq­qanlıq etipti. Ol da payın alıptı. Sárbinazdıń kózindegi jastı kórgen anası qorqıp ketti de: -Haw, qızım saǵan ne boldı?-dedi. Sińlisi tap urlıǵı bar adamday kóziniń astınan ájapasına urlanıp qarap qoydı. -Sizge… sizge sawǵa bermekshi edim, Aynur hámmesin wayran qıldı. Mınań qarań sizge sup-sulıw shulıq toqıǵan edim,-dep jılap jiberdi. Anası ashıwlı túrde Aynurǵa qaradı. -Men… meniń de sawǵamdı ol búldirip tasladı,-dedi sózden qalmay. Qızlarınıń islerine anası bul saparı shıntlap ashıwlandı. -Men sizlerden qapaman, qızlarım. Sizlerden bunday ádepsizlikti kútpegen edim,-dedi basın shayqap.

Sárbinaz benen Aynur oysızlıǵı sebepli tap bayram kúni anasınıń zeynine tiyip alǵanlıǵınan qattı pushayman boldı. Anasına shın kewilleri menen tayarlaǵan sawǵaları buyırmaǵanlıǵına tek ǵana ózleri ayıplı edi…

Ayzada Joldasbaeva

Ózbekstan Ishki Isler ministrliginiń Qaraqalpaq akademiyalıq liceyiniń oqıwshısı