Nókis qalasındaǵı «Bestóbe» elatında jaylasqan 30-sanlı ulıwma bilim beriw mektebinde «Jetkinshek-jaqın dostım» atamasındaǵı dógerek shól­kem­lestirilgen. Hár sárshembi kúni dógerekte oqıwshılar gazetanıń hár bir sanı menen tanısıp, ondaǵı dóretpelerdi birgelikte talqılap, pikir-usınısların bildiredi hám ózlerine ruwxıy azıq aladı. Dó­gerektegi oqıwshılar ádebiyatqa, dóretiwshilikke júdá qızıǵadı hám ózleri de qosıq, gúrriń, ertek, maqalalar jazıp turadı. Siz, kishkenelerge usı dógerektiń belsendi bes qızın jaqınnan tanıstırıwdı maqul kórdik.

Nargiza Jangabaeva-usı mekteptiń 6-klasında oqıydı. Dóge­rekke birin­shilerden aǵza bolǵan qız. Sebebi, ol maqala, qosıq jazıw­ǵa júdá ıq­laslı. Ási­re­se,  Zul­fiya atındaǵı mám­leketlik sıylıq iye­lerine júdá háwes etedi. Olarday talantlı, qábiletli qız bolıwdı qáleydi. Klasında eń úlgili qız. Barlıq sabaqlarınan aǵla baha­larǵa oqıydı. Tınıp-tın­shı­may­tuǵın, shaqqan Nargiza «Jet­kinshek» penen jaqın dos bolıp, maqa­lalar dóretip, ga­ze­tanıń ıqlas­benti bolıwdı kew­line túyip qoyıptı. Zulfiya sıylıǵınıń laureatı bolıw-onıń eń baslı niyeti.

Shaxida Jangabaeva-mekteptiń 4-klasında oqıytuǵın bul qız ele kish­kene bolsa da, júdá qá­biletli, zeyini ilgir. Klass bas­shısı A.Yakubovanıń eń jaqın járdemshisi. Ol da ájapası Nargizaǵa háwes etip, dóretiwshilikke qızıǵadı. «Jetkinshek»ti súyip oqıydı. Shaxida menen sóyleske­nimizde onıń sóylew sheberligi bizdi tań qal­dırdı. Apasınan esitken ápsana­ların, óziniń jazǵan gúrrińlerin, erteklerin hesh tartınbastan aytıp berdi. Kitabın shıǵarıw niyeti bar ekenligin esit­kenimizde, haqıy­qatında da onıń óz teńleslerinen qábileti, shaqqanlıǵı menen ajıralıp turatuǵınlıǵın sezdik.

Tumaris Shukur­ul­laeva-mektebinde shayır qız atanǵan bul qız shınında da, ol qosıqlar dóretip turadı. «Jet­kinshek»tiń iqlasbenti, ondaǵı jas qálem­kesh­lerdiń qosıq­ların qızı­ǵıwshılıq penen oqıp baradı. Ol kóbinese «Bestóbe»­niń búgingi jamalınan ilham­lanıp, qosıqlar jazadı. Bul elattaǵı kúnnen-kúnge rawaj­lanıp atır­ǵan jańalanıwlar, ózgerisler jas shayırǵa ayrıq­sha kúsh, il­ham beredi.

Keleshekte onıń da qosıq­lar toplamın shıǵarıw niyeti bar.

Ulmeken Serikbaeva-mektebiniń bilimli oqıw­shılarınıń biri. Bıyılǵı pán olim­pia­da­sında qara­qalpaq tili hám áde­biyatı páni­nen qat­na­sıp, sıylı orın­dı aldı hám respub­li­kalıq pán olimpiadasına jollama aldı. Ol klasınıń maq­tanıshı. Kishkeneliginen áde­biyatqa mehir qoyǵan. Qara­qalpaq klassik jazıwshı-shayır­larınıń hám basqa da ózbek, qazaq, shet el jazıwshılarınıń dó­retpelerin súyip oqıydı. Mek­teptegi keshelerge, jarıslarǵa belsene qatnasadı. Ulmeken ádiwli ustazlarınday muǵallim bolıwdı aldına maqset etken.

Aydaygúl Xojabaeva-ol da tınıp-tın­shımaytuǵın, bilimli qız. Pán olim­pia­dasınıń qa­lalıq bas­qı­shında qa­zaq tili hám ádebiyatı pá­ninen qat­nasıp, sıylıqlı orındı aldı.  Házir ol respublikalıq basqıshqa qızǵın tayarlıq kórmekte. Bos waqtında qazaq tilinde qosıqlar, maqalalar jazadı. «Jetkin­shek»tegi qızıqlı gúrrińlerdi, erteklerdi qaldırmay oqıydı hám onnan ózine ruwxıy azıq aladı. Ol pán olim­pia­dasınıń jeńimpazı bolıp, ustazların, ata-anasın quwan­tıwdı qáleydi.

Tayarlaǵan: Muxtar Úmbetov

Ózbekstan Respublikası Ishki Isler ministrliginiń Qaraqalpaq akademiyalıq liceyiniń oqıwshısı