(bolǵan waqıya)

Meniń er jetip kámalǵa ke­liwimde hám dóretiwshilik álemine qádem taslawımda miyirman ana­janımnıń xızmeti kóp. Bárqulla «Jetkinshek» ga­zetası redak­ciyasına birgelikte baratuǵın edik. Geyde men oqıwdan tısqarı dógereklerge qatna­ǵanlıqtan, waqtım bolmay atırǵan payıtları, jazǵan dó­retpe­lerimdi anam redakciyaǵa jetkeredi.

Bir kúni redakciyada «Dil­war» jas xabarshılar dóge­reginde ádebiy keshe bolatuǵın boldı. Anamnıń bolsa meni alıp ba­rıwǵa jumısları kóbeyip ketip, qolı tiymedi. Sonshelli dárejede anama úyrenisip qalıppan. Bir ózim uzaq jolǵa shıǵıp úyren­begen ekenmen. Solay etip, redak­ciyaǵa anamnıń siltewi menen bir ózim kettim.

Ádebiy keshe júdá zor bolıp ótti. Qaytıw waqtı da bolıp qaldı. Kósheler boylap «Diyqan» bazarına shıǵıwım kerek edi. Biraq, jolda ketip baratırıp al­jasayın dedim. Sonda aldım­nan bir hayal shıǵıp, bazar tá­repke baratuǵın joldı soradı. Men úp-úlken qız bola turıp, bilmeymen dep aytıwǵa qısındım.

-Apa, men de sol tárepke baratırman,-dep albıraǵa­nım­nan aytıp qoydım. Shamalap kóshe­lerden ótip kete berdik. Ol jol boyı mennen qay jerde oqıytuǵınlıǵımdı hám nelerge qızıǵatuǵınlıǵımdı soradı. Men tabıslarım haqqında tolıp-tasıp aytıp berdim. Hayal bolsa, awıllıq jerde turatuǵının hám kóp qıyınshılıqlardı basınan keshir­genligi haqqında ayttı. Meniń jetiskenliklerimdi esitip, quwandı.

-Qızım, waqtında bilim, ilim alǵan jaqsı. Házirgi waqıtta ne úyrenemen deseń, barlıq sha­rayatlar bar. Kitap hám gazeta-jurnallardı oqıǵan adam hesh waqıtta kem bol­maydı,-dedi ol.

Ekew-ara sóylesip, dem de bazarǵa kelgenimizdi de bilmey qaldıq. Men hayaldıń ismin sorayın dep atırǵanımda, tosattan onıń qol telefonına qońıraw keldi. Ol maǵan qolın siltedi de, xoshlasıp ketti.

Biytanıs hayaldıń aqıl-ná­siyatları maǵan úlken tásir etti, ájayıp dóretpeler jazıwıma jáne de túrtki boldı.

Biybijamal Reyimbaeva

Paytaxtımızdaǵı I.Yusupov atındaǵı qánigelestirilgen mektep-internatınıń oqıwshısı