Qádirli klubımızdıń ıqlasbentleri! Sizler menen klubımız arqalı diydarlaspaǵanımızǵa da kóp waqıtlar  boldı. Negedur, klubımızǵa sońǵı payıtları ıqlasbentlerimizden xatlar kelmey qaldı. Shınında da, oqıwshılar ishki kewil-keshirmelerin, ózlerin qıynap júrgen mashqalaların bizge jazıp jiberiwge tartınadı. Álbette, olardıń mashqalaların ashıq-aydın gazetaǵa járiyalawǵa doslarınan, ata-analarınan, ustazlarınan uyalıwı tábiyiy. Súyikli gazetańız hámiyshe sizlerdi qollap-quwatlap, pikir-usınıslarıńızdı itibarǵa alıp, óz járdemin ayamaydı. Sonlıqtan, bizge xat jollawǵa hesh qashan ekilenbeń!

Búgingi klubımızda xabarshılarımızdan kelgen xatlardı sizlerdiń názerińizge usınamız.

 

7-klasta oqıytuǵın Gúlnur qızıǵıwshań, tınıp-tınshı­maytuǵın, bilimli qız. Awıldan kelip oqıp atırǵanına kóp waqıt bolmasa da, klaslasları menen tez til tabısıp ketti. Ol sportqa da júdá qızıǵadı. Biraq, Gúl­nurdıń ata-anası oǵan sport penen shuǵıllanıwına ruqsat etpeydi. Olar sport qız balaǵa jaraspaydı dep oylaydı. Gúlnur sportqa qatnasqısı keletuǵınlıǵın aytıp baslaǵanınan ata-anası sol pikirin qaytalaydı. Bir kúni ol maǵan jarıldı. «Jáne meni gazetadan shıǵarıp, ata-anamdı qapa etip almayın»,-dedi maǵan kúlim­sirep.

Kúnlerdıń birinde Gúlnurdıń mektebinde qılıshpazlıq boyın­sha biypul dógerek ashılǵanlıǵı haqqında xabar tarqaldı. Bul xabardı esitken kópshilik oqıwshılar qızıǵıp, dógerekke qatnay basladı. Klaslasları trenerdıń bul sport túrin jaqsı úyretip atırǵanlıǵın maqtap kelgende, Gúlnurdıń da qı­zıǵıwshılıǵı oyandı. Biraq, dógerekke bararın ya barmasın bilmey bası qattı. Degen menen, onıń sportqa degen ıqlası ústin kelip, qılıshpazlıqqa qatnay basladı. Lekin, bunı ata-ana­sınan sır tuttı.  Gúlnur hádemey-aq uqıplılıǵı, shaqqanlıǵı menen basqalardan ajıralıp, treneriniń itibarına tústi. Hár kúngi shınıǵıwlar onı jáne de bul sportqa tarttı. Bir kúni treneri jaqın kúnlerde jarıs bola­tu­ǵın­lıǵın ayttı. Bul jarıs oqıwshılar ushın birinshi tájiriybe edi. Jarıs jaqınlasqan sayın trener tayar­lıqtı kúsheytip, oqıwshılar menen keshke deyin shınıǵıwlar isleytuǵın edi. Ásirese, ol Gúlnurdan úmiti kóp ekenligin, tayarlıqlardan qalıp qoymawın eskertti. Sol kúnlerdiń birinde Gúlnurǵa anası qońıraw etip ala almaydı. Qızı zalda bánt bol­ǵannan keyin, telefonnan sóylesiw múmkinshiligi bol­maydı. Telefonǵa qayta-qayta qońıraw kele bergennen soń, Gúlnurdıń klaslas dostı telefondı kóterip, onıń sport zalda qılıshpazlıq penen shúǵıllanıp atırǵanın aytıp qoyadı. Bunı esitken anası dárhal telefondı Gúlnurǵa beriwin aytadı. Ay­sánem zalǵa juwırıp barıp, telefondı dostına beredi. Gúlnur anası ekenligin bilip, qorqıp ketedi.

Erteńine Gúlnur klasına kózleri isip keledi. Dosları onnan ne bolǵanın soraǵanda qılıshpazlıqtan ketkenin aytadı. Eger, sporttan ketpesem ata-anam meni awılǵa qaytarıp jiberip, sol jaqtaǵı mektepte oqıytuǵınımdı ayttı dep ókirip jılap jiberdi. Dosları oǵan ne aytarın bilmedi. Oǵan janı ashıdı, doslarınıń da onıń chempion bolatuǵınlıǵına isenimi kúshli edi. Dostın sport­qa qaytarıwın qansha qálemesin, bunıń hesh ilajı joq edi. Óytkeni  Gúlnur ata-anasınıń túsin­bewshiligi sebepli óz qızıǵıw­shılıǵınan waz keshgen edi.

Gúldana.