Bıyılǵı test sınaqları aldınǵılarǵa qaraǵanda biraz óz­gesheliklerge iye. Atap aytqanda, sorawlar sanınıń qıs­qar­tılıwı, hámme bir kúnde emes, onbes kún dawamında test sınaǵınan ótiwi hám eń baslısı test nátiyjeleriniń tap­sırǵan kúnniń erteńine anıq bolıwı baslı ózgesheliklerden bolıp sanaladı. Mine, usınday jańasha test sınaqların ádalatlı hám áshkaralıq usılda ótkeriw ushın paytaxtımızda barlıq ilajlar kórilgen. Biz Nókis Olimpiya rezervleri kolledjindegi test ótkeriletuǵın zalǵa baqlaw kameralarınıń ornatıl­ǵanlıǵınıń gúwası boldıq hám test tapsırıp atırǵanlardı bolsa monitor arqalı keń jámiyetshilikke kórsetilip atırǵanlıǵı dıqqatqa ılayıq. Mámleketimizde úsınday test sınaqları ele dawam etip atır. Bul jerde turıp kewilli túrde, júzinde quwanısh penen test tapsırıp shıqqan, búgin bolsa test nátiyjesin kóriwge kelip student bolǵanınan quwanıshlı qaytıp kiyatırǵan qızdı hám onıń anasın sáwbetke tarttıq.

-Men Ubayxanova Ulbosın bıyıl úshinshi jılı test sınaǵına qatnasıp kórdim. Nókis máde­niyat hám kórkem óner kol­ledjin pitkergenmen. Eki jıl tayarlıq kórdim hám bıyıl Ózbekstan mádeniyat hám kórkem óner institutınıń Nókis filialınıń jańadan ashılǵan kitapxana xabar iskerligi qánigeligine tapsırǵan edim hám búgin besinshi byudjet bolıp oqıwǵa qabıllanǵanımdı kórip quwandım. Bıyılǵı test aldınǵılarına qaraǵanda birqansha qolaylıq­larǵa iye. Sorawlardıń ıqsham­lastırılǵanlıǵı maǵan júdá unadı hám bul test men ushın áwmetli boldı dep oylayman.

-Qızım Ulbosınnıń bıyılǵı test sınaǵınan tabıslı túrde ótkenligi meni úlken quwa­nıshqa bólemekte. Ótken jılları student bola almaǵan edi. Mine, búgingi tabısı olardı juwıp ketti. Tayarlanǵan miynetiniń jemi­sin kórip, oqısań, úyrenseń nátiyjesi kútkenimizdey bola­tuǵınlıǵına jáne bir márte isendik.

Studentlik soqpaǵına qaray jolǵa atlanǵan hár bir abi­turientke studentlik baxtı nesip etiwin hám miynetleri jemissiz qalmawın tileymiz.

Záripbay Yaxiyaev

arnawlı xabarshımız