Mámleketimizde bunnan bir neshe jıllar aldın balalar sportın rawajlandırıw boyınsha baslanǵan sistemalı is-ilajlar búgin óziniń miywesin bermekte. Bunı jáhán arenalarında sportshı balalarımız hám jas óspirimlerimizdiń erisip atırǵan joqarı nátiyjelerinen kóriwimizge boladı. Bunnan da áhmiyetlisi, hár bir shańaraqta per­zentlerin kishkeneliginen-aq sport dógereklerine beriw, sol arqalı olardı salamat turmıs qálpi tiykarında jasawǵa úyretiw hám watan­súyiwshilik, jeńiske umtılıw sıyaqlı unamlı qásiyetlerdi tárbiyalaw ǵalabalıq dástúrge aylandı. Bunıń ushın, mámleketimizde sporttıń kópshilik túrleri boyınsha balalar hám jas óspirimler sport mektepleri jumıs alıp baradı.

Usınday sport mektep­leriniń biri Nókis qalasında jaylasqan Respublikalıq oyın túrleri hám jeńil atletika boyınsha qánigelestirilgen balalar hám jas ós­pirimler sport mektebi bolıp, házirgi kúni bul dárgayda sport­tıń 10 túri (basketbol, voley­bol, qol tobı, regbi, fut­bol, badmin­ton, tennis, stol tennisi, shaxmat hám mini futbol) bo­yınsha 1915 balalar hám jas ós­pirimler turaqlı shuǵıl­lanadı. Olarǵa 56 tre­ner-oqı­tıwshı sport sırların úyretip atır.

Mekteptiń jetisken­likleri haqqında onıń direktorı Dáwletmurat Qalxorazov penen sáw­beskenimizde: -Biziń mektebimiz sońǵı jıllarda Ózbekstan hám jáhán kóle­minde jaqsı nátiyjelerge erisiwi menen kópshiliktiń dıqqatın tartpaqta. Ótken 2017-jıldıń ózinde mek­tebimizdiń tárbiyala­nıw­shıları Ózbekstan chempio­natı hám kubok jarıslarında jámi 76 altın, 100 gúmis, 86 bronza medalların, al, xalıq aralıq jarıslarda 1 altın medaldı qolǵa kirgizdi hám Qaraqalpaqstan Respub­likası Dene-tárbiya hám sport ministrliginiń «Jıldıń eń jaqsı sport mektebi» nomi­na­ciyasın jeńip aldı. Bunnan ruwxlanǵan dárga­yımız jámááti hám tárbiya­lanıwshıları 2018-jıldıń ótken jeti ayında Ózbekstan kóleminde ulıwma 163 medaldı qolǵa kirgizip, xalıq aralıq jarıslarda 1 altın hám 1 bronza medalların alıp qayttı. Bul nátiyjeler sport­shı balalarımızdıń arasınan Ózbekstan saylandı koman­dasına tańlap alınıwshılar sanın 72 ge jetiwine tiykar boldı,-dedi ol bizdi shını­ǵıwlar zalına mirát etip.

Zalǵa kirip barar ekenbiz, ol jerde mekteptiń 2003-2004-jıllarda tuwılǵan ba­lalardan quralǵan qol tobı komandası aǵzalarınıń táji­riybeli jas trener Buxarbay Pirniyazov basshılıǵında kelesi úlken jarısqa qızǵın tayarlıq kórip atırǵanınıń ústinen shıqtıq. Komanda aǵzalarınıń top penen islesiwin, ustazı aytqan háreketlerdi sheberlik penen orınlawın, hár qıylı kom­binaciyalardı ámelge ası­rıwın tamashalap biraz turdıq. Sál keyinirek olardıń azǵantay dem alıwınan paydalanıp, komanda aǵ­zaları menen jaqınnan tanıstıq.

-Men qol tobı dógeregine 5 jıldan berli qatnasaman. Mektebimizde qol tobı dógeregi ashılǵanı, qálew­shiler bolsa qatnasıwı múmkin ekenligi haqqında trenerler kelip aytqannan soń, qatnap baslaǵan edim. Keyin ala jarıslarǵa qat­nasıp, qol tobı sport túrine ayrıqsha mehir qoydım. Komandamız benen ótken jılı Ózbekstan hám Qara­qalpaqstan chem­pionat­larında sıylı orınlardı iye­ledik,-deydi qol tobı boyın­sha Ózbekstan saylandı komandası aǵzası, paytax­tımızdaǵı 9-sanlı ulıwma bilim beriw mektebiniń 10-klass oqıwshısı Ábdirasul Naǵmanov.

Komanda aǵzalarınıń kópshiligi sport mektebiniń qarsı aldında jaylasqan 9-sanlı mekteptiń oqıwshıları bolıp, olardıń sabaqtan bos waqıtlarında sportqa dos tutınıwı kimdi bolsa da quwandıradı. Olar haqqında topar treneri B.Pirniyazov ta tolıp-tasıp: -Toparımızda 12 bala bar bolıp, olardıń barlıǵı fizikalıq jaqtan salamat, shaqqan hám bi­limli oqıwshılar. Bul dóge­rekke olar dáslep dene sala­matlıǵı ushın qatnap basla­ǵan bolsa, házir olardıń hár biri Ózbekstan hám jáhán arenalarında sıylı orınlardı iyelewdı maqset etken. Ko­mandamızda Timur Oraz­baev, Jasurbek Qońıratbaev, Atabek Áwez­baev, Muwsa Bekbaevlar Ózbekstan say­landı koman­dası quramına kirgizilgen. Olardan úmitim kúshli,-deydi maqtanısh penen.

Haqıyqatında da, bul sportshı balalar úmit baylawǵa turarlıq. Se­bebi, olarda toparlıq sport oyınlarda eń kerekli bolǵan koman­dalıq birge islesiw, biri birin túsiniw hám qol­lap-quwatlaw sıyaqlı qásiyetler jaqsı tárbiya­lanǵan. Hár jılı Ita­liyada ótkeriletuǵın qol tobı boyınsha xalıq-aralıq turnirge qatnasıw topar aǵzalarınıń barlıǵı ushın úlken maqset, alǵa umtıldırıwshı kúsh. Olardıń bul maqsetleri jaqın jıllar ishinde orın­lanıp, elimizge altın medal­lar menen oralıwına tilek­leslik bildirip, sport mektebi menen xoshlastıq.

B.Sultamuratov

arnawlı xabarshımız

R.Arzievtiń túsirgen súwreti