Bir kúni úyimizge qala­daǵı ájapam bes jasar qızı Asiya menen keldi. Asiya júdá qızıǵıwshań qız. Soraw beriwge hesh sharsha­maydı. Ol  júda miynetkesh. Qanday jumıs tapsırsań da, yaq demeydi. Jumıstı shala islese de, tezirek orınlawǵa háreket etedi. Ol mal, tawıqlardı qızıq kóredi. Olardıń júrgeni, ot-jem jegeni bári-bári qızıq. Ásirese, shójelerdi júdá jaqsı kóredi. Olardı uslap alıp, oynaǵısı keledi. Biraq, shójeler oǵan hesh uslatpaydı.

Bir kúni keshki payıt padadan kelgen eshkilerdi qamamaqshı boldım. Sonda Asiya da jarmasıp, «men de járdem­le­se­men» dep shulǵıp shıqtı. Qasımda júrip, eshkilerdi qoraǵa qamastı. Bir waqıtta ol ózi appaq, biraq, ayaǵında qara daǵı bar eshkini kórdi de, ań-tańı shıqtı. Soń mennen:

-Ájapa, anaw eshkiniń dizesi nege jırtıq?-dep sorap qaldı. Men onıń gápin esitip, birden kúlip jiberdim. Birazdan soń kúlkimdi basıp aldım da, oǵan haywanlar kiyim kiymey­tuǵınlıǵın, eshkiniń tábiyatınan solay tuwılǵanın jaqsılap túsindirdim.

Rabiǵa Shabatova

Nókis rayonındaǵı 20-sanlı ulıwma bilim beriw mektebiniń oqıwshısı