• 2008-jılı 2-avgust kúni Ózbekstan Respublikası Prezidentiniń pármanı menen Ózbekstan Ekologiyalıq Háreketine tiykar salındı. Hárekettiń bas maqseti-qorshaǵan ortalıqtı hám insan salamatlıǵın qorǵawǵa baǵdarlanǵan ideyalar hám joybarlardı qollap-quwatlaw, bul boyınsha xalıqtıń belsendiligin arttırıw, ekologiyalıq bilim hám mádeniyattı en jaydırıw bolıp, Ózbekstannıń búgingi puqaraları hám keleshek áwladları salamat qorshaǵan ortalıqta jasaw huquqına iye bolıwı, xalıq salamatlıǵın jaqsılawǵa hám qorǵawǵa, tábiyǵıy resurslardan nátiyjeli paydalanıwǵa baǵdarlanǵan is-ilajlardı ámelge asıradı. Shólkemniń mámleketimizde ámelge asırılıp atırǵan hár qanday jámiyetlik-siyasiy hám ekonomikalıq reformalardı ekologiyalıq kóz-qarastan úyrenip shıǵıwı hám zárúr bolsa ózgerisler kirgiziwi, sonday-aq, qorshaǵan ortalıqtı hám insan salamatlıǵın qorǵaw boyınsha nızam joybarların islep shıǵıwı ushın Ózbekstan Respublikası Oliy Májlisi Nızamshılıq palatasınan 15 deputatlıq orın ajıratılǵan.

 

  • Aysánem BEGIMOVA — Ózbekstan Ekologiyalıq Háreketi Qaraqalpaqstan Respublikası aymaqlıq bólimi baslıǵı;

-Mám­le­ketimiz basshısı ót­ken jılı 12-iyul kúni bolıp ótken videoselektorda islegen baya­natında xalıqtı, ásirese, awıllıq jerlerdi taza ishimlik suwı menen támiyinlew elege she­kem soraw astında turǵanlıǵın, turmıslıq taslandılardı jıynaw, qayta islew hám zıyansız­landırıw máselesi de aldı­mızda turǵan eń awır mashqala eken­ligin aytqan edi. Biziń re­gionı­mız Aral teńizine jaqın jaylas­qanlıǵın esapqa alsaq, Ózbek­stan Eko­logiyalıq Háre­ketiniń Qaraqal­paqstan aymaq­lıq bó­liminiń iskerligin ele de jeti­listiriw kerekligin túsinemiz.

Házirgi waqıtta bólimimiz xızmetkerleri tárepinen jaslar sanasına ekologiyalıq tálim-tárbiya hám mádeniyattı siń­diriw, qorshaǵan ortalıqtıń patas­lanıwınıń aldın alıw, hay­wanat dúnyasın qorǵaw boyın­sha hár qıylı ilajlardı ámelge asırıp kelmekte. Ásirese, kele­shegimiz bolǵan balalarǵa eko­logiyalıq bilim beriw maqse­tinde balalar baqsha­larında, mekteplerde, licey hám kolledj­lerde hár qıylı ilajlar ótkeril­mekte. Pay­tax­tımızdaǵı 4-37-sanlı ulıwma bilim beriw mek­tepleri, «Prog­ress» bilim­lendiriw hám rawaj­landırıw orayında «Qızıl kitap»qa kir­gizilgen hay­wanatlardı qorǵaw maqsetinde ekologiyalıq klublar shólkem­lestirgenbiz. Hár jılı ekolo­gi­yalıq sánelerde birge islesiwshi shólkemler menen birgelikte usı mekteplerdiń oqıwshıları qat­nasıwında tań­lawlar, festivallar hám akciyalar ótkerip turamız. Álbette, bul ilajlardıń barlıǵı qorshaǵan ortalıqtı qorǵaw islerinde puqaralardıń belsen­diligin arttırıwda, xalıq arasında ekologiyalıq mádeniyattı ele de jetilistiriwde nátiyjesin beredi.

Haqıyqatında da, Ózbekstan Ekologiyalıq Háreketiniń óz­leriniń ekologiyalıq bilimlen­diriw jumısların mektep hám mektepke shekemgi bilimlen­diriw máke­meleri tárbiyalanıw­shılarına baǵdarlawı keleshekte úlken nátiyjeler beredi. Ásirese, Há­reket tárepinen balalar ushın «Buloqcha» ekologiyalıq jur­nalınıń shólkemlestiriliwi mektep oqıwshıların dóretiw­shilik arqalı tábiyatqa jaqın­lastırıp atır. Sonday-aq, shól­kemniń jergilikli bólimi xız­metkerleri de mine bir neshe jıllardan berli «Jetkinshek» ga­ze­tası menen balalardıń ekolo­giyalıq bilimin hám mádeniya­tın arttırıwda birge islemekte. Ga­zetadaǵı burınǵı «Qarlı­ǵash» klubınıń «Eko­háreket» klubına aylanıwı da óz-ara birge isle­siwdiń nátiyjesi boldı dep aytsaq boladı. Bul birge islesiw jaqında Ózbekstan Eko­logiyalıq Háre­keti baslaması menen ót­kerilgen XVI Res­publikalıq ekojurna­listika tań­lawında ózi­niń bahasın aldı hám «Jetkinshek» gazetası «Baspasóz» tarawı boyınsha tańlaw jeńimpazı boldı.

Juwmaqlastırıp aytqanda, búgingidey ekologiyalıq qıyın sharayatta Ózbekstan Eko­logiyalıq Háreketiniń xalıqtı qorshaǵan ortalıqtı qorǵawǵa shaqırıw, puqaralardıń, ásirese, balalardıń ekologiyalıq bilim hám mádeniyatın ele de je­tilistiriw, usıǵan sáykes nızam hújjetlerin islep shıǵıw uqsaǵan sawaplı islerine tabıslar tileymiz.