Jurnalistika tarawı masha­qatlı bolıp, xalqımız arasındaǵı «jur­nalistti eki ayaǵı baǵadı» degen sóz biykarǵa aytılma­ǵan. Shı­nında da, biz kóple­gen obekt­lerge baramız, túrli insanlar menen júzlesemiz hám ózimiz toplaǵan maǵlıw­matlardı aq qaǵazǵa sulıwlap, mazmunlı etip túsiriwge háreket etemiz. Maqalanıń mazmunı sayız, oqıwshı bir ilerlik nárse almasa, eki ayaq penen gezip, saatlap etken miynetiń pushqa ketedi. Sonlıqtan, bul taraw jurna­listten tek shaqqanlıq emes, bilim hám az da bolsa táńri bergen talanttı iske salıwdı talap etedi. Biraq, jıllar ótken sayın jurnalist izlense, tınımsız miynet etse, onıń qálemi ót­kirlesip bara beredi.

Balalardıń súyikli gazetası «Jetkinshek» gazetası da ullı dárgaylardan sanaladı. Usı jer­de qanshama respub­likamızǵa belgili insanlar qálem terbetip, keyingi áwladlar ushın úlken mektep jaratıp ketti. Elege shekem ayırım jazıwshı hám shayırlar «Jetkinshek»ten qol úzbey, «balalarǵa bazarlıǵ»­ın alıp keledi.

Genjebay aǵa Júginisov ta «Jetkinshek» gazetasında kóp jıllar miynet etti hám elege shekem redakciya esigin tın­dırmay balalar ushın jazıp kelgen maqala hám qosıqların usınıp turadı.

Genjebay aǵa Kegeyli rayonındaǵı házirgi «Jalpaq jap» awılında tuwılıp, ká­malǵa keledi. Mektepte oqıp júrgen waqıt­larında us­tazları Jumamurat aǵa Jaqsı­muratov hám Meń­li­murat Xoja­muratovlar onıń áde­biyatqa degen qızıǵıw­shılıǵın arttırdı. Mektep­tegi «Shanıshqı» hám «Tikenek» diywalı gaze­talarına aǵza boldı hám dáslepki dó­retpe­lerin dó­rete basladı. «Jetkin­shek» ga­zetasında eń dáslep «Joytılǵan botinka», «Al­ǵıs aldım atamnan», «Jaza», «Kitap bilim bulaǵı» maqalaları jarıq kórdi. Áne sol waqıttan baslap onıń jurnalis­tikaǵa degen ıqlası arttı. Mek­tepte oqıp júrip, hár qıylı tańlaw­larǵa, pánler olimpia­dasına qatnasıp, mek­tepti ayrıqsha bahalarǵa tamam­ladı. Házirgi Nókis mádeniyat hám kór­kem óner kolledjinde oqıp júrip te respublikalıq basılım­larda jiyi-jiyi óz maqa­laları menen qatnasıp turdı. Úsh jıllıq ás­keriy xızmet dawamında da Rossiyanıń basılımlarında flot turmısınan materiallar já­riyalap turdı. Áskeriy xız­metten kelgennen soń, Gen­jebay aǵa «Erkin Qaraqal­paqstan» gazetasında korrek­tor bolıp, miynet jolın basladı.

-Ol waqıtları gazetanıń redaktorı marhum shayır, Ózbekstan Qaharmanı Ib­rayım Yusupov edi. Onnan kóp nárselerdi úyren­dim. Onıń menen islesiw men ushın úlken mektep boldı,-deydi Genjebay aǵa.

Sonday-aq, Genjebay aǵa Kegeyli rayonlıq mádeniyat bóliminde jumıs islegenin, Kegeyli rayonlıq gazetasınıń redaktorı Embergen aǵa Erimbetov penen birgelikte 1985-jılı Tashkent qalasındaǵı awıl xabarshılarınıń siezdine qatnasqanın sóz arasında aytıp berdi.

Al, «Jetkinshek» gazetasına Ábdimurat aǵa Atajanov onı jumısqa aladı hám redak­ciyada onaltı jıl tabıslı miynet etedi. Onıń sol jılları gazetada  qızıqlı maqalaları, ocherk hám qosıq­ları oqıwshılar ná­zerine usı­nıladı. Onıń «Hesh bir ana jaman bala tuw­may­dı» atlı maqalası Ishki isler bóliminiń tańlawında, «Atam qalay qus saldı?» maqalası Aral fondı tárepinen shól­kemlestirilgen tańlawda jeńimpaz boldı.

Genjebay aǵa «Ustaz jolı» gazetasında da tabıslı miynet etti. 1992-jıldan baslap Óz­bek­stan Jurnalistler dóretiw­shilik awqamınıń aǵzasına aylandı Sonday-aq, onıń kishkenelerge arnalǵan «Pay­ǵazı», «Timur bardı baqsha­ǵa», «Qara kózler», «Sıyla­sıq», «Qarlıǵashlarım»  hám «Tulpar» atlı toplamları bas­padan jarıq kórdi. Genjebay Júginisov elege shekem res­pub­likalıq basılım­larǵa óz maqa­laları menen belsendi qatnasıp kelmekte. Biz bel­sendi jurnalist Genjebay aǵaǵa jumıslarında tabıs hám kúsh-ǵayrat tileymiz.

E.XOJAMURATOVA,

S.JOLDÍBAEV