Áziz klubımızdıń ıqlasbentleri, gózzal qızlar! Minekey, jazǵı dem alısta analarıńızdıń jaqın járdemshisi bolıp, hár qıylı mazalı taǵamlar, shiyrinlikler pisirip, tayarlawdı úyrenip atırǵan bolsańız, biz de bunnan quwanıshlımız. Sebebi, qız bala ádep-ikramlı, bilimli, shaqqan bolıw menen birge, sheber aspaz, pázende bolıp jetilisse, analarıńızdıń maqtanıshı, súyenishi bolıwıńız anıq.

Búgingi klubımızda ádettegidey qız bala tárbiyası baslı orında turadı.

Shańaraqta perzent tárbiyası keń kólemli hám juwap­kershilikti qatań talap etetuǵın process. Ásirese, qız balanı tár­biyalaw júdá qıyın hám mu­qaddes wazıypa. Sebebi, bunda ul balalar tárbiyası sıyaqlı kóbirek fizikalıq tárepke emes, bálkim etikalıq hám tárbiyalıq jaqtan ósip-ulǵayıwına ayrıqsha itibar beriledi.

Qız bala úlkeye kele úy-jumısların orınlawda anasına járdemlesiwge háreket etedi. Olardıń bul umtılısların són­dirmew kerek. Qızlarımızǵa hám ana hám ustaz ekenimizdi umıtpawımız shárt. Aqırı, olar bolajaq úy biykesi, biz onıń keleshegi ushın juwapkermiz. Qızlarımızdıń qáddi-qáwmetine say qolına sipse, shań artatuǵın shúberek, chyotka berip, olardı azadalıqqa úyretiwdi kishke­neliginen baslaw kerek. Qamır iylep atırǵanıńızda oǵan qolın tıǵıp oynap atırǵan qızıńızǵa keyimeń, kerisinshe, onıń qolın uslap, háreketlerdi birge orınlań. Ata-ana bolıw bir waqıttıń ózinde jaqın dos, sheber ustaz bolıw wazıypası moynıńızda ekenligin umıtpań.

Qız balanı dene gigienasına ámel etiwin úyretiw kóbirek analarǵa juwapkershilik júk­leydi. Sır emes, balalar ata-analarına elikleydi. Sonıń ushın, eń áwele XXI-ásir hayalı tek ǵana mehriban, keńpeyil, shıdamlı bolıp qalmay, bálkim keń hám tereń maǵlıwmatlı, ózi ushın gúrese alatuǵın bolıwı lazım. Qız balada bunday qásiyetlerdi qáliplestiriw ushın olardı qalay tárbiyalaymız? Tájiriybelerimiz sonı kórsetedi, tek ǵana jeke ózimiz olarǵa úlgi kórsetip, buǵan erisiw múmkin. Bazı da úlkenler kerekli násiyatların beredi de, biraq ózleri oǵan ámel etpeydi. Bala bolsa tek ǵana kózi menen emes, qálbi menen hámmesin sezedi.

Qız bala tárbiyasında eń áhmiyetlisi, onı ǵamxor, meh­riban etip tárbiyalaw menen birge, olardıń úy-ruwzıgershilik jumısların biymálel orınlay alıwın, basqalarǵa álpayımlılıq penen múnásibette bolıwın úyretiw lazım. Búgingi kúnniń iybeli malikaları tek ǵana bunday pazıyletler menen sheklenip qalıwdı qálemeydi. Zamanagóy tereń bilimge iye bolıwdı hám bul arqalı dúnya mámleketlerinde tájiriybelerin arttırǵısı keledi. Qız balaǵa ata-anasınıń isenimi júdá áhmiyetli. Ata-ana onıń arzıwların, niyet hám zárúrliklerin hámiyshe túsinip, qollap-quwatlasa ǵana ózine bolǵan isenimin bek­kemleydi. Sonda ǵana ol tábiyat inam etken qábiletin rawaj­landıra aladı.

Ul balalar qollap-quwat­lawǵa, qızlar bolsa ǵamxorlıqqa mútáj boladı. Qız bala jeterlishe ǵamxorlıqtı sezbes eken, onıń átirapındaǵılarǵa isenimi tómenleydi. Qızlar kishkene­li­ginen-aq ata-anaları menen másláhátlesedi, pikirlerin ortaqlasadı. Eger, óz pikirine biypárwa múnásibetti sezse, olarǵa sóylep beriwden toqtaydı. Qız balanı qáteleri ushın keyigende qáhárli bolmań. Tábiyattan názik qızlar júdá tásirsheń boladı. Saldamlılıq penen onıń qáteleri aytılsa, qızıńız túsinedi hám onı dúzetiwge háreket etedi. Qızlar ádette baslaǵan nársesin aqırına jetkeriwge talpınadı. Bunda olarǵa kesent etpeń, eger ol súwret salıwdı qálese, qosıq aytqısı kelse, yamasa, kiyiniw, shash túrmegin ózgertkisi kelse, ruxsat beriń, meyli ózin sınap kórsin.

Qız balanı bezeytuǵın eń úlken pazıyletlerdiń biri bul- iybelilik. Solay eken, qızlardıń tek ǵana sırtqı kórinisi shıraylı bolıp qalmastan, bálkim ishki álemi de gózzal bolıp, hár ekewi de uyǵınlassa, bul hár bir ata-ananıń maqtanıshı esaplanadı.

Klubtı tayarlaǵan; Z.Isakova