• Qádirli balalar! Búgingi zaman jańalanıwlar, jańa reformalar qızǵın ámelge asırılıp atırǵan, rawajlanıwlar dáwiri. Bunı siz átirapıńızda, respublikamızda, pútkil Ózbekstanda júz berip atırǵan unamlı ózgerisler arqalı ayqın kóre alasız. Ásirese, mámleketimizdiń basshısı tárepinen xalıqtıń múnásip ómir súriwi ushın jaratılıp berilip atırǵan imkaniyatlar kimdi bolsa da usı jańalanıwlarǵa óz úlesin qosıwǵa talpındıradı. Usınday jańalanıwlar qatarına Prezidentimizdiń baslaması menen usı jıldıń 27-iyun sánesinde qabıl etilgen «Abat máhálle» Baǵdarlaması sheńberinde mámleketimizdiń barlıq aymaqlarında islenip atırǵan qurılıs hám abadanlastırıw jumısların kirgizsek boladı. Eń quwanıshlısı, óz awıl hám elatlarında júz berip atırǵan usınday unamlı ózgerislerden ilhamlanıp, olar haqqında «Jetkinshek»ke xat jollap atırǵan oqıwshılarımız da barshılıq. Usılardı inabatqa alıp, gazetamızda «Abat máhállem» rubrikasın shólkemlestiriwdi uyǵardıq.
  • REDAKCIYA
  • «Kim menen másláhát­lesip jumıs islewimiz kerek-eń dás­lep xalqımız benen. Sonda xalqımız bizden razı boladı».

Jurtbasshı­mız­dıń bul sóz­leri áyne payıtta mámleketimizdiń hár bir múye­shinde ámelge asırılıp atırǵan ullı ózgeris­ler­diń ayqın dáliyli de­sek qáte­les­peymiz.  Buǵan mısal etip, men ózim jasay­tuǵın «Bestóbe» mákan puqa­ralar jıyınında xalıqtıń párawan turmıs keshiriwi ushın islenip atırǵan qurılıs hám abadan­lastırıw jumısların aytıp ót­pekshimen.

Biziń elatımız Nókis qala­sınan 27 kilometr uzaqlıqta jaylasqan bolıp, ol mámle­ketimiz táre­pinen ámelge asırılıp atırǵan «Abat máhálle» Baǵdarlamasına kirgizildi. Sonlıqtan, házirgi waqıtta elatımızda qurılıs hám aba­danlastırıw jumısları qızǵın dawam etpekte. Bul jerde balalar maydanshası, kóp qabatlı imaratlar, shıǵındı tas­law orınları puqaralarǵa pay­dalanıw ushın tapsırılıw aldında tur. Taza ishimlik suwı menen támiyinlew boyınsha jumıslar islenip atır. Aldınları elatımızda ishimlik suwı mashqalası bar edi. Suw waqıt penen aǵatuǵın edi. Sonıń ushın qattı qıy­nalatuǵın edik. Al, házir taza suw tru­baları tartılıp, qálegen waqıtta ishimlik suwınan paydalanıw imkaniyatı jaratıldı. Bunnan elatımız puqaraları minnetdar bolıp,  ózleri de bul jumıslarda qol­larınan kelgen járdemlerin berip atır. Bunnan tısqarı, qala hákiminińђxalıq penen bir neshe márte ushı­rasıwları ótkerilip, olarda xalıqtıń soraw­larına juwaplar beril­mekte.

Maqalam arqalı eń aldı menen «Abat máhálle» Baǵ­darlamasına tiykar salǵan Prezidentimizge elatımız xalqı atınan kóp-kóp raxmet aytaman. Usınday shara­yatlardı jaratıp berip atırǵan eken, biz álbette, olardan únemli paydalanıp, Jurt­basshımızdıń isenimin aq­laymız.

Muxtar Úmbetov

Ózbekstan Respublikası Ishki isler ministrligi Qa­raqalpaq akademiyalıq liceyi oqıwshısı