Túrli reńler menen hár túrli  kórinislerdi sáwlelendirip kózlerdi tańlandıratuǵın kórkem óner túrleriniń biri bul súwretlew óneri bolıp tabıladı. Bul ónerge qızıǵıp hám ullı xudojniklerge háwes etip, jaslayınan-aq bul ónerdi úyreniwge bel baylaǵan talantlılar  kópshilikti quraydı. Mine usınday háweskerlerimizdiń biri Kegeyli rayonındaǵı 42-sanlı ulıwma bilim beriw mektebiniń 8-klasına ótip atırǵan Alixoja Tilepbaev.

-Alixoja dógerekke kelgen kúnniń ózinde talantı, ilgir zeyni hám shaqqanlıǵı menen kózge tústi. Onıń ayrıqsha qábilet iyesi ekenligin túsiniw qıyın emes. Kishkene bolı­wına qaramastan súwret­lewdiń mayda detallarına shekem úyrenip kelmekte. Bul onıń qızıǵıwshılıǵınıń úlken ekenliginen derek. Onıń Ózbekstan kólemindegi qolǵa kirgizgen jetiskenligi hám­memizdi quwanıshqa bóledi,-deydi «Bárkamal áwlad» balalar orayındaǵı dógerek basshısı Venera Pirlenova.

Ol eń dáslep Quwat Kó­kenovtan súwret salıw óneriniń sırların úyrene baslaydı. Ondaǵı qı­zı­ǵıwshılıqtı sezip, oǵan reńlerden qalay paydalanıwdı hám nelerge itibar qaratıw kerekligin úyrete baslaǵan. Ol súwret salıwǵa 4 jasınan baslap qızıqqan hám sol qızıǵıwshılıǵı onı búgingi kúnde basqıshpa-basqısh jetiskenliklerge qaray jetelep barmaqta. 2017-jılı «Balalar hám suw» tańlawınıń res­publikalıq basqıshında 2-orındı, «Salamat turmıs tárizi tárepdarımız» respublikalıq  tańlawında 1-orındı, «Jasıl planetamızdıń taǵdiri óz qolımızda»  tańlawında 2-orındı, 2018-jılı Kegeyli rayonlıq Keńesi tárepinen ótkerilgen «Qádiriyatlarımızdı qádirleymiz» atamasındaǵı tańlawda 1-orındı iyeledi.

Respublikalıq «Bárkamal áwlad» balalar orayı tárepi­nen ótkerilgen «AIJS hám ná­she­bentlikke qarsı gúre­seyik!» atamasındaǵı tań­lawınıń Qaraqalpaqstan respublikalıq basqıshında 1-orındı iyelep, Ózbekstan respublikalıq basqıshına jollama alıp ol jerde de 1-orındı alıwǵa miyassar boldı. -Súwretlew ónerine qızı­ǵıwshılıǵım joqarı bolǵan­lıqtan dógerekke aǵza boldım hám ózim kútpegen nátiy­jelerge erisip atırman. Óz­bekstan kóleminde birin­shilikti qolǵa kirgiziwdi oylamaǵan da edim. Biraq, dóretpemdi múnasip dep tapqanlıǵınan júdá-júdá quwandım hám bul meni úlken maqsetlerge qaray baǵdarladı, ózime bolǵan isenimdi ele de kúsheytti. Bul álbette, birinshi náw­bette ata-anamnıń hám ustazlarımnıń tabısı. Olarǵa sheksiz minnetdarshılıq bildiremen hám keleshekte belgili xudojnik bolıp olardıń maǵan bildirgen isenimin aqlawǵa háreket etemen,-deydi Alixoja. Házigi kúnde jazǵı demalısın ata-anasına kómeklesiw, óner sırların úyreniw hám kitaplar oqıw menen ótkerip atırǵan Alixoja úlken maq­setlerdi kewline túygen. Jas kewilde oyanǵan ullı maq­setlerdiń orınlanıwına hám elimizdi dúnyaǵa tanıtıwına tilekleslik bildirip, jeńisi menen jáne bir márte qutlıqlaymız.

Záripbay YAXIYAEV

arnawlı xabarshımız