Elimizde Óz­bek­stan Jas­lar Aw­qa­mınıń dúzil­genine bir jıl to­lıw múná­sibeti menen «Jaslar bayramı» kóterińki ruwxta ót­kerildi. Ál­bette, Jaslar Awqamındaǵı bel­sendi jaslardıń erisken tabısları da bir talay. Biz olardıń biri Qa­raózek rayonındaǵı 8-sanlı ulıwma bilim beriw mektebiniń Jaslar Awqamı jetekshisi Malika Bishekovanı oqıwshılarǵa jaqınnan tanıs­tırıwdı maqul kórdik.

 

«Terbenbes júrekler» júreklerdi terbetkende…

Bizlerdiń Malika menen ushırasıwımız tosınnan boldı. Jaqında ótkerilgen «Jıldıń eń jaqsı kitapqumar mektebi» respublikalıq kitapqumarlar tańlawında Malika óziniń belsendiligi, shaqqanlıǵı menen kózge tústi. Ol óziniń kitapqumarlıqtı engiziw boyınsha tańlawda  usınǵan prezentaciyası da tóreshilerde ayrıqsha tásir qaldırdı. Ol óz joybarı sheńberinde mektep, klass sárdarları, psixolog hám jetekshiler menen birgelikte sabaqtan tómen bahalarǵa oqıytuǵın oqıwshılardı kitap oqıwǵa iytermelew maqsetinde qanday jumıslardı islep atırǵanlıǵın kórsete aldı. Al, sońınan bolsa «Shaytannıń shaǵımı» atlı monologın  sheberlik penen atqarǵanda, bul qız aktrisalıqqa oqıǵanba dep tóreshilerdiń tań qalǵanı ıras. Ol tańlawda óziniń sawatlılıǵı, ayrıqsha talantı menen «Jıldıń eń jaqsı kitapqumar jetekshisi» nominaciyası boyınsha jeńimpaz boldı.

Malika «Shaytannıń shaǵı­mı» monologın atqarǵanda onıń júzi bizge júdá ısıq kórindi. Shınında da, onıń júzi kóp­shi­likke tanıs. Ol Qaraqalpaq mámleketlik universitetinde oqıp júrgen payıtlarında «Jay­hun» teatr studiyasına qatnasıp júrip, «Biz ullı jurt perzent­lerimiz!» festivalında «Terbenbes jú­rekler» atlı spektaklin oneki wálayat teatrlarınıń úlken saxnalarında rol atqarıw nesip etti. Usı spektakldiń premie­rasın  Berdaq atındaǵı Qara­qalpaq mámleketlik akade­mi­yalıq teatrına biz de tama­sha­lawǵa barǵanımızda festivalǵa kelgen Ózbekstanǵa belgili aktyorlar premieradan soń spektakldi joqarı bahaladı. Ásirese, Malikanıń atqarǵan roli hámmede ayrıqsha tásir qal­dırdı. «Terbenbes júrekler» spektakli pútkil tamashagóy­lerdiń júreklerin terbetip, kózlerge erksiz jas kólegóy­let­ti. Áne sol waqıtta tek biz emes, pútkil zaldaǵılar Mali­kanıń talantına tásiyn qaldı.

 

Tabıslar tabıslarǵa ulasqanda…

Biz Malika menen sáw­betlesip, onıń jetiskenlikleri haqqında soraǵanımızda bul qızdıń shınında da, tınıp-tın­shımaytuǵın  insan ekenli­giniń gúwası boldıq. Malika mektepte oqıp júrgen payıt­larınan baslap-aq óziniń shaqqanlıǵı, bilimge qushtar­lıǵı menen basqa bala­lardan ayrıqshalandı. 9-klass waq­tında ózbek tili páninen Pánler olimpiadasına qat­nasıp, respublikalıq basqıshta 3-orınǵa ılayıq dep tabıldı hám NMPI qasındaǵı aka­demiyalıq liceyge imtixansız oqıwǵa qabıllandı. Ol jerdi de ayrıqsha bahalar menen tamamlap, QMUniń studenti boldı. Malika studentlik dá­wirinde kóplegen tabıslarǵa eristi. «Jayhun» teatr stu­diyasınıń, «Dáwir qızları» klubınıń, «Jayhun» quwnaqlar hám ziyrekler komandasınıń belsendi aǵzasına aylanıp, hár qıylı ilajlarǵa, tańlawlarǵa qatnasıp, talantın shıńlandırıp bardı. «Jas jurnalistler» klu­bında oqıp júrip, «Eń jaqsı jurnalist», Zulfiyaxanımnıń júz jıllıǵına arnalǵan student­ler arasında ótkerilgen tań­lawda «Eń jaqsı maqala avtorı», Xalıq demok­ratiyalıq partiyası tárepinen ótkerilgen «Jas siyasatshı» tańlawınıń respub­likalıq bas­qıshında «Eń úlgili jas siya­satshı» nomina­ciyası boyınsha jeńimpaz boldı.

Ózińiz oqıp gúwası bol­ǵanıńızday Malika tabısları tabısları ulasqan sayın bul taraw maǵan tiyisli emes dep qarap otırmadı. Ol hár tárep­leme ózin sınnan ótkerdi hám ele de ǵayratlılıqtı qoldan jibermey kiyatır.

 

Shaqmaqtıń tasınday…

Hár bir sózi, islegen isi shaqmaqtıń tasınday degen pikirdi biz Malikaǵa ılayıq dep bildik. Ol óz sózinde: «-Men ózime tapsırılǵan hár qanday tapsırmanı artıǵı menen, juwapkershilikti se­zinip orın­lawǵa háreket etemen. Jaslar jetekshisi bolıw ushın, biz ózimiz islegen isimiz hám sóylegen sózimiz benen oqıw­shılarǵa órnek bolıwımız kerek. Jurtbas­shı­mızdıń biz jaslarǵa bildirgen isenimin aqlawımız kerek! Búgin biz islep atırǵan jumıs­lar kún kelip, elimizdiń rawaj­lanıwına óz úlesin qo­sıwına isenemen,-deydi Malika biz benen sáwbette.

Búgingi kúni elimizde jaslar siyasatına ayrıqsha itibar qaratılıp, bul baǵdarda túrli  ilajlar ámelge asırılmaqta. Usınday jumıslardı ámelge asırıwda Malikaday ǵayratlı, talapshań, belsendi jaslardıń xızmeti girewli. Biz de eli­mizde usınday jaslardıń kóbeye beriwine tileklespiz, Malikanıń bolsa aldaǵı jumıslarında tabıslar tileymiz.

E.Xojamuratova

arnawlı  xabarshımız