bty

Jazǵı dem alısta waqtım kóp bolǵanlıqtan, kóbinese úlken atamnıń úyine qıdırıp baraman. Hár saparı úyine barǵanımda atamnıń bir qansha el basshıları menen túsken súwretleri, kókireginde jarqırap turǵan medalları, bir neshe «Húrmet jarlıq»ları itibarımdı tartadı. Men sonda atamnıń elimiz ushın pidayılıq penen xızmet etkenlerin kórip súysinemen, onı maq­tanısh etemen. Haqıyqatında da, atam Uzaqbergen Tilewmuratov elimizdıń awıl xojalıǵı hám ishki isler tarawında jemisli miynet etken.

Men atamnıń shawlıq qızıman. Ol hárdayım aqlıq-shawlıqlarına aqıl-násiyat­ların beriwden, balalı­ǵındaǵı waqıyalardan aytıp beriwden hasla jalıq­paydı. Atamnıń ba­lalıǵı urıs jıllarına tuwrı kel­genlikten, kóp qıyın­shılıqlar menen kún keshirgen. Bala waq­tınan awır miynette pisken, biraq, soǵan qaramastan ol oqıw­ǵa ayrıqsha ıqlas qoyǵan. Oqıp-izle­niwden toqtamay, mudamı bilim alıwǵa tal­pınǵan. Atam ba­la­lıǵın awır gúrsinip, eske aladı.

-Balalarım, bizlerdiń bala­lıǵı­mızda házirgidey imkaniyatlar joq edi. Oqıwǵa, sabaq tayar­lawǵa, oynawǵa hesh waqtımız bolmay, atızlarda miynet ete­tuǵın edik. Biraq, anam Kariymanıń qollap-quwat­lawı, hadal miyneti, tuwrı sózliligi  menen joqarı oqıw ornında oqıp, óz kásibimniń mamanı boldım. Sonıń ushın sizlerge ay­tarım, kitap oqıw­dan jalıq­pań, imka­niyat­lardan tuwrı paydalanıń,-deydi. Atamnıń hár bir sózinde tereń máni bar. Bizler onıń násiyat­larına qulaq tutıp, jaqsı oqıwǵa háreket etemiz.

Atam ekinshi jer júzilik urıstan keyingi jıllarda eli­mizde sharwashılıqtıń, pax­tashılıqtıń rawajlanıwına hám pal ónimleriniń kó­beyiwine kóp miynetin sińdirgen. Ol xal­qımızǵa 45 jıl xızmet etken bolsa, sonıń 40 jılın basshı lawazımlarda islegen. Al, bizlerdiń súyikli gaze­tamız «Jetkinshek» urıstan keyin jabılıp, shıqpay qal­ǵanda, 1958-jıldan baslap qaytadan baspadan shıǵa­rılıwına úlken úles qosqan. Álbette, atamnıń bul miy­netleri elimiz tárepinen múnásip bahalanıp, kóp­legen ataqlar hám kókirek nıshan­ları menen sıy­lıqlandı. Atam­nıń 2010-jılı baspadan óziniń ómir jolı haqqında «Ómir ótkelleri» atlı kitabı shıqtı. Men bul kitaptı oqıp, júdá tásir­lendim hám usınday ullı insannıń shawlıǵı eken­li­gim­nen súysindim.

Atam kempir apam Maryam Nurmuxam­me­dova menen 4 ul 4 qızdı tárbiyalap, bar­lıǵın joqarı maǵ­lıwmatlı etip, hadal­lıqqa, tuwrı sóz­li­likke úy­retken. Át­teń, kempir apam 83 jasta bul dúnya­dan ótti. Mudamı kúlim­lep kútip alatuǵın miyir­man apam há­miyshe júregi­mizdiń tórinde jasaydı.

Atam jaqında 90 jasın qarsı aldı. Men atama júz jas penen júzlesiwin, shańa­ra­ǵımızdıń sawlatı bolıp, aq pátiyańızdı beriw­den hasla shar­sha­mań deymen!

Dilbar Tursınbaeva

Nókis qalasındaǵı 11-sanlı ulıwma bilim beriw mek­tebiniń 9-klass oqıwshısı