Jaqında redakciyamızǵa shomanaylı belsendi xabarshımız Aysholpan Jumabaeva quwanıshlı túrde kirip keldi. Álbette, ol qanday tabısqa erispesin, birinshi náwbette súyikli gazetasına jetkergenshe asıǵadı. Bul saparı da onnan  jaqında bolıp ótken respublikalıq «Bilimliler bellesiwi» jarısında qaraqal­paq tili hám ádebiyatı páninen sıylıqlı 2-orındı alǵan­lıǵın esitip, biz de onıń jetiskenligi menen qutlıqladıq.

Aysholpan kishkeneliginen kempir apasınan ertek, ápsana, ráwiyatlardı esitip, erjetti. Apasınıń aytqan hár bir áńgimesin qunt penen tıńlap, qıyalında ózin sol er­teklerdegi malikaday sezer edi. «Ertekler jaqsılıqqa jetekler» degendey, balalıǵında-aq, sa­nasına sińip qalǵan bul aǵla pazıyletler onı ádebiyat maydanına jeteledi. «Kempir apam­nıń: -«Kitap-kele­shekke bas­lawshı ustazıń»… degen násiyatı meni mudamı kitap penen dos tutınıwıma baǵdarladı, tákirar-tákirar maǵan kitaptan qol úz­bewimdi násiyat­laytuǵın edi»-deydi Aysholpan. -Ol úlkeye kele apasınan esitkenlerin qaǵazǵa shıjbaylap, «Jetkinshek» gaze­tasına jolladı. «Kempir apam aytqan áńgime» rubrikası astında dáslepki maqalası jarıq kórgeninde  apası ekewiniń quwanıshı óz aldına boldı. Mine sonnan berli Aysholpan súyikli gazetasınan qol úzgen joq. Sho­manaydıń búgıngi jamalı jas qálemkeshke jáne de ilham ba­ǵıshlap, redakciyaǵa xatlardı «qarday borattı». Balalar turmısınan jazılǵan bir-birinen qızıqlı maqalaları menen gazetanıń ıqlasbentlerine tanıldı. Haqıyqatında da, óz shańa­raǵınan baslanǵan ádebiyatqa bolǵan ayrıqsha ıqlas, kitap­qumarlıq onı búgin úlken tabıslarǵa basladı.

Aysholpan 5-kla­sınan baslap «Bilim­liler bel­lesiwi» jarısına qatnasıp, óz teń­lesleri arasında bilim­danlıǵı menen kózge túsip kiyatır. Ol tórt jıldan berli jarıstıń res­pub­likalıq bas­qıshında sıylıqlı 1-2-3-orınlardı alıp, ózi tálim alıp atırǵan 24-sanlı ulıwma bilim beriw mektebiniń maq­tanıshına aylandı. -Men áde­biyat maydanında qálem terbetip, dóre­tiwshilikke qoyǵan dáslepki qáde­mimnen baslap-aq, bul pán meni ózine sıyqırlap aldı. Ásirese, kórkem ádebiyatımızdıń biybaha úlgileri, ullı tulǵalarımızdıń dóret­peleri meniń qızıǵıwshılıǵımdı asırıp, bul pándi ele de tereńirek úyreniwdi niyet ettim. Ustazlarım Shamsiya apa Qallı­qılısheva hám Sharap Bawet­dinovtıń járdeminde bilim kónlikpelerimdi bayıtıp, jarısqa kúshli tayarlıqlar menen bardım. Nátiyjede 87,3 ball toplap, 2-orındı alıwǵa miya­sar boldım. Jarıstıń arnawlı diplomı hám sensorlı telefonı nesiyp etti. Óz ge­zeginde ustazlarıma minnet­darshılıǵımdı bildiremen. Menıń eń baslı maqsetim-al­daǵı pán olim­pia­dalarında sıylıqlı orınlardı alıp, joqarı oqıw ornına imtixansız kirip, mu­ǵallim bolıw,-deydi qahar­manımız.

Shınında da, Ay­sholpan umtı­lıwshań, iz­leniwsheń, niyetleri jolın­da miynet etiwden sharsha­may­tuǵın qız. Onıń arzıwları kóp. Oǵan jetisiw ushın isenim menen qádem tas­lamaqta. Dóretiwshilik qábiletin ele de jetilistirip, kitap shıǵar­maqshı.  Shomanaylı bilimdan qızdıń bul pák niyetlerine biz de tilekles bolıp, mudamı jetiskenlikler joldas bolsın deymiz.

Z.Isakova

arnawlı xabarshımız