Búgingi kúnde Wata­nımızdıń rawajlanıwı, dúnya  mámleketleri arasında óz ornına iye bolıwı ushın isbilermenlerge keń jol ashılǵan. Isbilermenler ózleri tańlaǵan isbilermenlik túrleri menen shuǵıllanıp, elimizdiń rawajlanıwına óz úleslerin qosıp atırǵanlıǵın televizor­dan kóp kórgenmen. Biziń rayo­nımızda da, isbilermen aǵa-apalar júdá kóp. Máselen biziń awılımızda isbilermen Gúlbáhár apa Eshmuratova da rayon orayınan dúkan ashıp, xalqımızdı arzan hám sapalı azıq-awqat penen támiyin­lemekte. Ol dúkan qasınan  tigiw cexın shól­kemlestirip, ol jerde sheber ájapa­larımız kiyim-ken­shekler tigiw menen shuǵıl­lan­baqta. Tikken kiyim­le­rin tek rayon kóle­minde emes, qoń­sılas Qazaqstan Res­pub­likasına da satıl­maqta.

Al, Mırzaxan Joldas­baeva apamız bolsa, soda ónimlerin islep shı­ǵarmaqta. Men de usınday isbilermen apa­larımızǵa háwes etemen hám kele­shekte isbilermen bol­maqshıman. Úyimizde tawıq­lardı baǵıp, áste-áste rawaj­landırıp, tawıq fermasın ashpaqshıman. Yaǵnıy, xal­qımızdı tawıq góshi hám máyek penen támiynlesem deymen. Házir de úyimde tawıqlarım bar. Olarǵa waqtında suw hám dánlerin berip turaman. Meniń ta­wıqlarǵa ǵamxorshı eken­ligimdi sezgen ata-anam:

-«Fermer bala, tawıqlarıńa qaradıń ba?»-dep házillesedi. Men ata-anamnıń bul gáp­lerine quwanıp, tawıqlarıma bunnan da jaqsı qarayman. Tawıqlarım házir shóje shıǵarıw aldında. Al, ótken jılǵı shójelerim úlkeyip qaldı. Tawıqlarım kóbeygen sayın quwanaman. Anam maǵan bárqulla járdemlesedi. Hár kúni sabaqlarımdı da tayar­lasadı. Meniń tawıq baǵıwǵa degen ıqlasımdı kórgen anam meniń usı maqalanı jazıwǵa járdemlesti. Keleshekte ál­bette, kóp oqıp, ata-anamnıń isenimin aqlap isbilermen bolıwǵa háreket etemen.

Sulayman Qalbaev

Shımbay rayonındaǵı 44-sanlı ulıwma bilim beriw mektebiniń  oqıwshısı