Gimnastika sport túrleriniń ara­sında óziniń názik hám shıraylı háreketleri menen bas­qalarınan ajıralıp turadı. Sonlıqtan, bul sport túri kópshilik qızlarımızda qızıǵıwshılıq  oyatadı. Mine, usınday qızıǵıwshılıq  paytax­tımızdaǵı 22-sanlı ulıwma bilim beriw mektebiniń 2-klass oqıwshısı Aliya Sársenbaevanı da sport mek­tebine qaray  jeteledi.

Ol sporttıń gimnastika túri  menen  bes jasınan baslap shuǵıllana basladı. Treneri Zulfiya Isken­de­rovnanıń bergen  tálimi  hám  óziniń  jas kewlindegi  sportqa degen  ıqlas  hám  talap­shańlıǵınıń  nátiy­jesinde  ilayıqlı  jetisken­liklerge  erisip kelmekte. Ta­lapshań hám shaq­qan Aliya Qaraqal­paqstan  kóle­minde bolıp ótken  sport jarıslarında óz jónelisi boyınsha sıylı orınlardı  alıwǵa  múnásip dep tabıl­ǵan  bolsa, Úrgenishte Nawrız  bayramı múnásibeti menen  ótkerilgen jarısta  2-orındı, 2015-jıl Nawayıda ótkerilgen Ózbekstan Respublikası Konstituciyasınıń jigirma úsh jıllıq bayramına ar­nalǵan  sport  gimnastikası boyınsha  wálayat  gim­nas­tikası federaciyası ashıq  birinshiliginde 1-orındı, 2017-jıl Ózbekstan Res­publikasınıń  birinshi Prezidenti I.A.Kárimovtı eslewge arnalǵan sport gimnastikası  boyınsha wálayat  ashıq chempio­natında sıylı 1-orındı, 2017-jıl Samarqandta L.D.Jalnavakovoydı eslewge arnalǵan  gim­nastika sport ja­rısında 3-orındı iyeledi. Álbette, bunday tabıs­larǵa erisiw óz-ózinen emes ustazlardıń miyneti, qahar­manımızdıń bolsa  talap­shańlıǵı, ıqlası, ótkir zeyini hám jaqınlarınıń bildirgen isenimi hám qollap-quwat­lawlarınıń  nátiyjesi ekenligi sózsiz. Biz Aliyanıń bunnan da joqarı  shıńlardı gózlep, óz óneri menen órley beriwine shın júrekten tilekleslik  bildiremiz.

Záripbay  YAXIYAEV

arnawlı  xabarshımız

avtordıń túsirgen súwreti