Bıyıl kóshemizde Nawrız bayramı biziń úyde belgilenetuǵın boldi. Sonlıqtan úyde bayramǵa qızǵın tayarlıq kórile basladı. Apama kómeklesiw ushın qaladaǵı ájapam eki jasar qızı Dilbar menen úyge qıdırıp keldi. Bunnan úydegiler quwanıp qaldı. Shay iship bolǵannan soń apam úkeme «tawıqlarǵa dán sal» dedi. Bunı esitken Dilbar «dándi men salaman» dep ornınan ushıp turdı. Apam oǵan súysinip; «Mayli qızım, sen-aq dándi sala-ǵoy»-dep qolına bir kese júwerini uslattı. Birazdan soń Dilbar tap úlken jumıs pitkergendey; -«Apa, apa tawıqlarǵa dán saldım. Tawıqlar qattı ash bolıp qalıptı. Dándi demde jep qoydı. Jáne dán salayın, tawıqlar toymay qaldı»,-dedi qıyılıp. Apam bolsa; «Bárekella qızım, ilayım baxtıń súmelektey shiyrin bolsın!»-dedi basınan sıypap. Sińlimniń qulaǵına «súmelek» degen soz ersilew esitildi me, dárhal apama jalt etip qaradı da; « Haw, apa súmelek degen sóz jaman sóz emes pe?»-dedi hayran qalǵan pishinde. «Háy qızım-ay, saǵan jaman sóz aytıp ne qılayın?! Súmelek degen sonday tatlı taǵam. Erteń úyde pisirgende jep, dámin tatıp kóreseń. Sen shaması súmelek jep kórmegenseń-ǵoy. Qáne, biziń awıldıń súmelegin bir jep kór, dámi awzıńda qaladı. Kelesi jılı jáne súmelek jeymen dep úyge keleseń»-dedi túsindirip. Apamnıń gápin dıqqat penen tıńlap otırǵan Dilbar endi tezirek súmelek jegisi kelip qaldı. Erteńgi kúndi asıǵıslıq penen kúte basladı.

Aysulıw Bekmuratova

QMU janındaǵı akademiyalıq liceydiń oqıwshısı