Áziz klubımız ıqlasbentleri! Ayırım sebeplerge baylanıslı «Jas detektivler» klubı 2017-jıldıń oktyabr ayınan baslap úziliske túsip, gazetamız betlerinde berilmey qaldı. Degen menen, biz bul aralıqta sizlerden aldınǵı járiyalanǵan tapsırmalarǵa juwaplarıńız, sonday-aq, «Jas detektivler»diń kelesi sanlarında nelerdi bilgińiz keletuǵınlıǵı haqqında jazılǵan xatlarıńız kóbeyetuǵın shıǵar dep, kútken edik. Biraq, kerisinshe, klubqa xatlar keliwi siyreklesip, joqtıń átirapına kelip qaldı. Sonlıqtan, biz sizlerden jáne bir márte klubımızǵa belsene qatnasıwdı, ózlerińiz mektepte yamasa kósheńizdegi doslarıńız benen basıńızdan keshirgen detektiv waqıyalardı jiyi-jiyi jazıp turıwıńızdı soraymız. Klubımızda berilip barılatuǵın tapsırmalarǵa da juwaplar jollawdı esten shıǵarmań!

REDAKCIYADAN

REJELESTIRILGEN URLÍQ

Qalalıq ishki isler bólimine qıstawlı qońıraw keldi. Trubkanı inspektor Atamuratovtıń jár­demshisi Dáwletov kóterdi.

-Alo-o, alo ishki isler bólimi me? Azanda dúkanıma kelsem, dúkanımdaǵı zatlardı tonap ketipti. Tezirek jetip keliń! „ulomov kóshesi onbesinshi úydegi «Diamond» zergerlik dúkanına.

Dáwletov dárhal telefon trubkasın qoyıp, inspektor Atamuratovtıń bólmesine asıqtı. Oǵan qońıraw haqqında málim etip, ekewi mashinaǵa otırıp aytılǵan mánzilge jol aldı.

„ulomov kóshesi oraylıq kóshelerdiń biri edi. Kóshe túnde kúndizdey jaqtı bolıp turadı. Hár otız metrden kóshe fonarları qoyılǵan. Kópshilik imaratlarda arnawlı signali­zaciyalar bar. Sonlıqtan, bul kóshede jınayat júdá siyrek bolatuǵın edi. Usılardı oylap inspektor Atamuratov hayran bolıp kiyatır.

Jedel júrgen mashina hádemey «Diamond» dúkanına jetip keldi. Dúkan iyesi olardıń aldınan juwırıp shıǵıp, bolǵan hádiyseni ayta ketti. Inspektor Atamuratov dúkan ishi-sırtın bir kózden ótkerip bolıp, dúkan iyesin qasına shaqırdı. Onıń dıqqatın dúkannıń sırtqı tere­zesiniń sınǵan qıyaqları qala­yınsha dúkan sırtına túskeni tarttı.

-Qáne, endi bolǵan hádiyseni jáne bir márte aytıp beriń. Neler urlandı, kimnen gúmanıńız bar?,-dedi kóz áynegin qol oramalı menen sıpırıp turıp. Dúkan iyesi tap basqalar esitip qoy­masın degendey, onı shetirekke alıp, sıbırlap sóyledi.

-Keshe keshte saat toǵızda dúkandı jawıp, úyge qaytqan waqtımda hámmesi ornında edi. Azanda kelsem esiklerge hesh nárse qılmaǵan. Biraq, dúkan terezesi sındırılǵan. Sınǵan tereze qıyaqları mında,-dep dúkan sırtında jatqan tereze sınıqların kórsetkish barmaǵı menen nusqadı.

-Signalizaciya nege isle­megen? Terezeniń sırtqı temir torınan qalay kirgen? Gúmanıńız kimnen? Qanday qımbat bahalı zatlar urlandı?-dep soradı inspektor Atamuratov onıń kórsetken qıyaqların dıqqat penen tekserip turıp.

-Tap keshe taza taǵınshaqlar kelgen edi. Júdá qımbat. Almas taslı. Solar urlanǵan. Jáne bir-eki altın shınjırlar, júzikler joq. Hámmesi eliw millionnan artıq bahalanadı. Gúmanım… Gú­manım kimnen boladı? Ózińiz bilesiz, bul kóshe júdá tınısh. Urlasa, sırttan kelip urlawı múmkin. Bunı anıqlaw endi siziń jumısıńız shıǵar?-dedi dúkan iyesi inspektor Atamuratovtıń ótkir kóz qarasınan kózlerin basqa jaqqa alıp qashıp.

-Sizge haqıyqattı aytayın ba?-dedi ol dúkan iyesine, sınǵan qıyaqlardıń birewin jerden alıp, tekserip turıp,-qońsı dúkandaǵı satıwshı menen sóylesken edim. Ol siziń dúkanıńızǵa jaqın on kúnlikte hesh qanday jańa taǵınshaqlar kelmegenin ayttı. Qala berse, siziń terezeńiz dúkan ishkerisinen sındırılǵan. Sonlıqtan ayna qıyaqları dúkan sırtında jatır. Eger, urı sın­dırǵanda qıyaqlar ishkerige túsiwi kerek edi. Siz urlıq rejesin dúzgen waqtıńızda temir tordı umıtpaǵanıńızda, men sizge azǵantay bolsa da isengen bolar edim. Biraq, házir siz jalǵan kórsetpe bergenińiz ushın biz benen bólimge barıwıńızǵa tuwra keledi.

Bul sózlerden keyin dúkan­shınıń kózleri adırayıp, tili gúr­meliwge kelmey qaldı. Inspek­tordıń onıń urlıq rejesin dál aytıp beriwi hám endi ózi jalǵanı ushın jazaǵa tartılıwın oylap, mańla­yınan muzday ter shıqtı. Ne is­lerin bilmey, ayıbın únsiz moy­nına alıp, inspektor Atamu­ra­tovtıń izine erip, mashinaǵa otırdı.

(Dawamı bar)