Jaqında paytaxtımızdaǵı 1-sanlı Esjan baqsı atındaǵı balalar muzıka hám kórkem óner mektebi hám 27-sanlı ulıwma bilim beriw mektebinde 6-14 jastaǵı balalar arasında «Kamalak juldızları» balalar dóretiwshilik festivalınıń Nókis qalalıq basqıshı ótkerildi. Ótkerilgen festivalǵa talantlı, qábiletli hám ziyrek balalar  altı baǵdar boyınsha qatnasıp, ózlerin sınnan ótkerdi.

27-sanlı ulıwma bilim beriw mektebinde «F» jónelisi yaǵnıy ertek, qosıq, gúrriń, shıǵarma jazıw boyınsha hám «E» jónelisi: grafika, súwretshilik, músin­shilik, quraq quraw, kesteshilik, gilemshilik boyınsha qatnasqan oqıwshılar  óz miynetlerin kór­gizbege qoydı. Al, «F» jónelisi boyınsha qatnasqan talantlı oqıwshılar «„árezsiz el per­zentimen» temasında dóretpeler jazıp, ózleriniń dóretiwshilik qábiletin sınap kórdi.

1-sanlı Esjan baqsı atındaǵı balalar muzıka hám  kórkem óner mektebinde festivaldıń «A», «B», «C», «D» jónelisleri boyınsha kórkem ónerge ıqlas qoyǵan oqıwshılar óz talantların kórsetip, festivalǵa kóterińkilik baǵıshladı.

-Búgingi festivalǵa oqıwshılar júdá belsendi qatnasıp atır. Kishkeneler arasında talantlılar júdá kóp eken. Olardıń birewi qosıq aytsa, biri ayaq oyınların atqarıp atır, basqası, túrli saz ásbaplarınan namalar shert­pekte. Mine men házir kishkene oqıwshınıń jáhán muzıkasınıń kórnekli wákili Betxovenniń namasın shertkenine qayıl qaldım. Demek festivaldı ótkeriw arqalı elimizde talantlı, qábiletli balalardı anıqlap qoymastan, olardı hár tárepleme qollap-quwatlap, olardıń qálbinde watansúyiwshilik tuyǵısın sińdiriw baslı maqsetimiz sanaladı,-deydi Jaslar awqamı Qaraqalpaqstan Respublikalıq Keńesi janındaǵı Nókis qalalıq «Kamalak» balalar shólkeminiń baslıǵı Azamat Abibullaev.

Festival sońında tóreshiler tárepinen jeńimpazlar anıqlanıp, olar «Húrmet jarlıǵı» hám «Dip­lom» menen sıylıqlandı. Jeńim­pazlar festivaldıń respublikalıq basqıshına jollama aldı.

Óz xabarshımızdan

M.Habibullaevtıń túsirgen súwretleri