Jaqında Nókis mádeniyat hám kórkem óner kolledjinde Zulfiya atındaǵı mám­leketlik sıylıqqa talaban qızlar tańlawınıń res­publikalıq basqıshı ótkerildi. Tańlawda res­publikamızdaǵı qala hám rayonlardan kelgen ónerli, qábiletli, talantlı hám bilimli qızlar ilim, bilimlendiriw, ádebiyat, mádeniyat hám kórkem óner baǵdarları boyınsha bellesti.

Kópshilik qızlardıń kele­shektegi niyeti belgili shayır Zulfiya Isroilovaday bolıp, bárshege órnek bola­tuǵın hám Watanın súyip, xalqı ushın xızmet etetuǵın pidayı insan bolıw.

-Men rayonı­mız­daǵı eń úlgili hám ádebiyatqa ıqlas qoy­ǵan qızlarım Qun­dızay Yusupova hám Iroda Erdashovalardı tańlawǵa alıp keldim. Olar júdá talantlı jáne qábiletli qızlar. Kóplegen tańlawlarǵa qatnasıp, sıylı orınlardı iyelep kelmekte. Olardan úlken úmitimiz kóp!-deydi Zulfiya Allayarova Ámiwdárya rayonındaǵı «Bár­kamal áwlad» orayınıń «Jas jurnalistler hám sóz sheberligi» dógereginiń basshısı.

-Búgin men ushın ózgeshe kún boldı. Tań erteden ózim qatarlı qızlar úlken úmitler menen tańlawǵa qatnasıp atır. Meniń de aldıma qoyǵan maqsetim-Zulfiya qızı bolıw. «Júzden júyrik, mıńnan tulpar» de­genindey, jeńimpaz bolıwǵa bar kúsh- ǵayratımdı iske sala­man,-deydi tańlaw qatnasıwshısı Dinora Begdullaeva.

«Qız ósse, eldiń kórki» deydi dana xalqımız. Álbette, bul tańlawda eń belsendi, shaqqan, qábiletli hám ónerli qızlarımız sınnan ótip, kelesi basqıshqa jol­lamanı aladı. Bárshe qatna­sıwshılarǵa áwmet yar bolsın!

J.Ibadullaeva

arnawlı xabarshımız

M.Habibullaevtıń túsirgen súwreti